Fransada NATO-dan çıxışla bağlı qətnamə səsverməyə çıxarılır
Fransanın Milli Assambleyasında ölkənin NATO-dan çıxışı ilə bağlı qətnamə layihəsinin səsverməyə çıxarılması planlaşdırılır. Bu barədə Milli Assambleyanın vitse-prezidenti Klemans Gete açıqlama verib.
Crossmedia.az bu barədə xarici mediaya istinadən xəbər verir. Onun sözlərinə görə, ABŞ-ın son addımları fonunda Fransanın Şimali Atlantika Müqaviləsi Təşkilatında iştirakı məsələsi əvvəlkindən daha aktual xarakter alıb. Gete bildirib ki, NATO faktiki olaraq ABŞ-ın rəhbərliyi altında fəaliyyət göstərən və əsasən Vaşinqtonun maraqlarına xidmət edən hərbi alyansdır.
“Bu gün Fransanın NATO-da iştirakı məsələsi heç vaxt olmadığı qədər kəskin şəkildə gündəmə gəlir. Məhz buna görə də Fransanın NATO-dan, ilk növbədə isə alyansın birləşmiş hərbi komandanlığından planlı şəkildə çıxışını nəzərdə tutan qətnamə təklifini müzakirəyə təqdim edirəm”, – deyə o vurğulayıb.
Qeyd edək ki, bundan əvvəl Ağ Evdə Arktika regionunun və NATO-nun təhlükəsizliyinin təmin olunması üçün Qrenlandiyanın ABŞ-ın tərkib hissəsinə çevrilməsinin vacibliyi ilə bağlı açıqlama səsləndirilmişdi. Sözügedən bəyanat Avropa siyasi dairələrində, xüsusilə də Fransada ciddi müzakirələrə səbəb olub.
Sevinc Yarməmmədova
20:00 09.01.2026
Oxunuş sayı: 1179
