Putin Trampla danışıqda Kremlin mövqeyinin sərtləşdiriləcəyini bildirib
Rusiya Prezidenti Vladimir Putin ABŞ Prezidenti Donald Trampla dünənki telefon danışığı zamanı Moskvanın sülh danışıqlarında mövqeyini daha da sərtləşdirəcəyini bəyan edib.
Crossmedia.az xarici mediaya istinadən xəbər verir.
Məlumata görə, söhbət Ukraynanın Xarkov, Nikolayev, Sumı və Dnepropetrovsk vilayətlərinin müəyyən hissələrinin Donetsk bölgəsi ilə eyni vaxtda dəyişdirilməsindən imtinadan gedir. Kreml bu addımın yalnız bütün digər razılaşmalar yerinə yetirildikdən sonra mümkün ola biləcəyini, Ukrayna Silahlı Qüvvələrinin Donetskdən çıxarılması ilə paralel aparılmayacağını təklif edir.
Bundan əlavə, Moskva Ukrayna Silahlı Qüvvələrinin şəxsi heyətinin maksimal sayını “qırmızı xətlər” siyahısına daxil edib. Əvvəllər 800 min nəfərlik ordu sayını müzakirə mövzusu kimi qəbul edən Rusiya tərəfi indi Ukrayna ordusunun 250 min nəfərdən çox olmamasında israr edir və bu şərti razılaşma paketinin qəbul edilməsi üçün vacib hesab edir.
Qeyd olunur ki, əvvəllər əsas şərtlər paketinə Ukrayna Silahlı Qüvvələrinin Donbasdan çıxarılması, Ukraynanın NATO-ya üzv olmaması, NATO ölkələrinin qoşunlarının Ukrayna ərazisindən çıxarılması, eləcə də rus dili və Ukrayna Pravoslav Kilsəsinə qoyulan məhdudiyyətlərin aradan qaldırılması daxil idi. Yeni mərhələdə bu tələblərin də daha sərt formada irəli sürüləcəyi bildirilir.
18:10 30.12.2025
Oxunuş sayı: 1153
