Əmək və sosial siyasət
Dövlət Məşğulluq Agentliyi yeni layihə çərçivəsində ASCO ilə əməkdaşlıq edəcək
Əmək və Əhalinin Sosial Müdafiəsi Nazirliyinin tabeliyində Dövlət Məşğulluq Agentliyinin (DMA) və AZCON Holding şirkətlərindən olan “Azərbaycan Xəzər Dəniz Gəmiçiliyi” QSC-nin (ASCO) nümayəndələri arasında görüş keçirilib.
Crossmedia.az xəbər verir ki,Nazirliyin İctimaiyyətlə əlaqələr şöbəsindən verilən məlumata görə, görüşdə DMA-nın Azərbaycan vətəndaşlarının xarici ölkələrdə rəsmi və təhlükəsiz iş yerləri ilə təminatına dəstək göstərilməsi ilə bağlı yeni layihəsindən bəhs olunub.
Həmin iş yerlərinin bir qismi dənizçilik və gəmiçilik sahəsinə aid olduğundan bu sahədə ASCO ilə əməkdaşlıq imkanları müzakirə olunub. Layihə çərçivəsində xaricdə mövcud olan vakansiyaların əvvəlcədən təhlükəsizlik, etibarlılıq və hüquqi baxımdan araşdırıldıqdan sonra vətəndaşlara təqdim edildiyi qeyd olunub.
Müzakirələrdə vurğulanıb ki, ASCO-nun beynəlxalq əlaqələrinin genişliyi bu istiqamətdə əməkdaşlığa zəmin yaradır. Ona görə də dənizçilik peşələri üzrə uyğun vakansiyaların müəyyənləşdirilməsi, ilkin araşdırılması və düzgün mənbələr üzrə yönləndirilməsi məsələlərində ASCO-nun dəstək imkanları nəzərdən keçirilib.
İki qurum arasında əməkdaşlığın vətəndaşların xaricdə qeyd edilən iş yerləri üzrə təhlükəsiz və rəsmi məşğulluğuna, eyni zamanda, dənizçilik sahəsində ixtisaslı kadrların daha səmərəli istiqamətləndirilməsinə töhfə verə biləcəyi diqqətə çatdırılıb.
11:42 26.12.2025
Oxunuş sayı: 1551
