Heydər Əliyev idmanımızın dayağı, idmançıların ən yaxın dostu idi
Azərbaycanın məşhur idman adamları--istər dünya, Avropa və olimpiya çempionları, istərsə də görkəmli mütəxəssislər öz çıxışlarında, söhbət və müsahibələrində bu fikri dəfələrlə vurğulamış, Ulu öndərin idmana və idmançılara daimi qayğısı haqqında dərin minnətdarlıq hissi ilə danışmışlar. Ölkə idman ictimaiyyəti nümayəndələri qarşısında çıxışlarından birində idmana xüsusi qayğını öz üzərinə ğötürdüyünü və əmin ola bilərsiniz ki, bu qayğını daim hiss edəcəksiniz, deyən respublika rəhbəri ömrünün axırınadək verdiyi vədə ən yüksək səviyyədə əməl etdi.
İdmançılarımızın mötəbər beynəlxalq yarışlarda, xüsusən də dünya və Avropa çempionatlarında, Olimpiya və Paralimpiya Oyunlarında qazandıqları qələbə və medallara hamıdan çox sevinən də Heydər Əliyev idi. Yadımdadır, Azərbaycanın ən yaxşı idmançıları 1996-cı ildə Atlantada(ABŞ) keçirilən XXVI Olimpiya Oyunlarından vətənə qayıtdıqdan dərhal sonra onları Prezident Sarayında qəbul edən dövlət başçısı sərbəst güləş ustası Namiq Abdullayevin qazandığı gümüş medalı fəxrlə qızıl medala bərabər tutdu. Azərbaycan Respublikasının müstəqil komanda şəklində təmsil olunduğu elə ilk Olimpiadada medallarının hesabını açması tarixi hadisə idi.
İdman mətbuatımızın yaşlı nəsil nümayəndələrindən biri kimi 1974-cü ili xatırlayıram. Həmin il Azərbaycan KP MK-nın birinci katibi Heydər Əliyevin təşəbbüsü ilə keçirilən respublika partiya fəalları yığıncağı bütünlüklə bədən tərbiyəsi--idmanın vəziyyətinə və onu daha da yaxşılaşdırmaq yollarına həsr olunmuşdu. Məhz həmin yığıncaqda gedən açıq və prinsipial müzakirələrdən sonra Azərbaycanda bədən tərbiyəsi və idmanın inkişafında əsl yüksəliş dövrü başlandı.
Bu gün dərin hörmət və ehtiramla xatırladığımız Ümummilli lider Heydər Əliyev istər MK-nın birinci katibi, istərsə də ölkə Prezidenti kimi Azərbaycana rəhbərlik etdiyi uzun illər ərzində insan həyatının ayrılmaz tərkib hissəsi olan sağlamlıq və gümrahlıq məşğələlərini, yüksək nailiyyətlər idmanını daim diqqət mərkəzində saxlayıb və idmanımızın dayağı olub.
Heydər Əliyev beynəlxalq idman dairələrində də geniş nüfuz sahibi idi. Beynəlxalq Olimpiya Komitəsi (BOK) İcraiyyə Komitəsinin 1997-ci ildə İslandiyanın paytaxtı Reykyavik şəhərində keçirilən iclasında Azərbaycan rəhbərinin ümumdünya olimpiya hərəkatında böyük xidmətlərinə görə "Olimpiya ləyaqəti" mükafatı ilə təltif olunması haqqında qəbul etdiyi qərar da bunu təsdiq edirdi.
Oqtay BAYRAMOV,
Əməkdar jurnalist
11:10 12.12.2025
Oxunuş sayı: 3087
