İran elitasında yumşaq xarici siyasət çağırışları güclənir
İran siyasi elitası daxilində ölkənin xarici siyasət kursunun, xüsusilə də ABŞ, İsrail və ərəb dövlətləri ilə əlaqələrin yenidən nəzərdən keçirilməsi ilə bağlı çağırışlar artmaqdadır.
Crossmedia.az Financial Times-a istinadən xəbər verir ki, bu tendensiyanın “inqilabın oğulları” adlandırılan yeni nəsil yüksək çinli məmurlardan gəlib. Söhbət sistem daxilində yetişmiş, hakimiyyət strukturlarında əhəmiyyətli mövqe tutan şəxslərdən gedir.
Nəşr bu səslərin əsas nümayəndələrindən biri kimi İran ali rəhbərinin müşavirinin oğlu Həmzə Səfəvini göstərir. Onun sözlərinə görə, Tehran yeni münaqişələrdən yayınmaq üçün Qərblə ideoloji qarşıdurmanı yumşaltmalı, regionda daha praqmatik siyasət yürütməlidir. Səfəvi bildirib ki, İsrail 1967-ci il sərhədləri ilə razılaşacağı halda İranın iki dövlətli həll modelini nəzəri baxımdan dəstəkləməsi mümkündür.
Digər nüfuzlu səs kimi keçmiş deputat və sabiq prezident Rəfsəncaninin qızı Faize Haşimi də ABŞ ilə diplomatik əlaqələrin bərpasının vacibliyini vurğulayıb. O qeyd edib ki, İranın “normal dövlət kimi” öz maraqlarını qoruya bilməsi üçün beynəlxalq arenada yeni münasibətlər qurması zəruridir.
Məlumata görə, İran rəsmiləri Qərbə açıq şəkildə göstərməyə çalışırlar ki, ölkədə istənilən dəyişiklik müxalifətdən və küçə etirazlarından deyil, məhz hakimiyyət daxilindən başlaya bilər və bu proses milli sabitliyi riskə atmadan həyata keçirilə bilər.
20:12 28.11.2025
Oxunuş sayı: 787
