Avropa Parlamenti: Rusiya aktivləri Ukraynaya köçürülməlidir və sülhdən əvvəl atəşkəs təmin olunmalıdır
Avropa Parlamenti Ukrayna ilə bağlı geniş qətnamə qəbul edərək, Aİ-nin sülh danışıqlarında iştirakına icazə verilməsini və dondurulmuş Rusiya aktivlərinin Kiyevə köçürülməsini tələb edib.
Crossmedia.az xarici KİV-ə istinadən xəbər verir ki, qətnamədə Avropa İttifaqının Rusiyanın Ukraynada işğal etdiyi yeni bölgələri heç vaxt qanuni olaraq tanımayacağı xüsusi vurğulanır. Sənədə əsasən, Ukraynanın Rusiyanın vetosu olmadan öz təhlükəsizlik və siyasi ittifaqlarını sərbəst şəkildə seçmək hüququna malik olduğu bildirilib.
Qətnamədə qeyd olunur ki, hər hansı davamlı sülhün təmin olunması üçün əvvəlcə atəşkəs elan edilməli və bu proses etibarlı təhlükəsizlik zəmanətləri ilə dəstəklənməlidir. Bundan əlavə, sülh müqaviləsinin Ukraynaya dəymiş maddi və qeyri-maddi zərərin Rusiya tərəfindən tam kompensasiya edilməsini təmin etməsi vacib sayılır.
Avropa Parlamenti həmçinin Ukraynaya “təzminat krediti” verilməsini təklif edib. Bu mexanizm ölkənin bərpasına yönəlik maliyyə imkanlarının genişləndirilməsini hədəfləyir.
19:58 28.11.2025
Oxunuş sayı: 876
