Kəlbəcər Azərbaycanın dirçəliş simvoludur - Deputat
Kəlbəcər Azərbaycan üçün sadəcə bir coğrafiya deyil — mərdliyin, dözümün və yenidən dirçəlişin simvoludur. 1993-cü ildə işğal zamanı minlərlə sakin doğma yurdunu tərk etməyə məcbur oldu, bölgənin tarixi, mədəni və təbii sərvətləri dağıdıldı. Amma xalqın qəlbində bir arzu heç vaxt sönmədi: Kəlbəcərə qayıdış.
Bu arzu 2020-ci il Qələbəsi ilə gerçək oldu. Kəlbəcər bir güllə atmadan, siyasi-hərbi üstünlüyümüz nəticəsində sülh yolu ilə Azərbaycana qaytarıldı. 25 noyabr tarixi məhz buna görə milli yaddaşda xüsusi yer tutur.
Bu gün Kəlbəcər yeni həyat qazanır: yollar, tunellər, yaşayış məhəllələri, təhsil və səhiyyə obyektləri sürətlə inşa olunur. İstisu kimi unikal məkanların bərpası isə bölgənin böyük potensialını yenidən ortaya çıxarır. Kəlbəcər Azərbaycanın dirçəliş nümunəsidir.
Bu günün əhəmiyyəti ilə bağlı Milli Məclisin deputatı Pərvanə Vəliyeva Kəlbəcərin işğalı, 2020-ci ildə bölgənin sülh yolu ilə Azərbaycana qaytarılması və hazırda aparılan genişmiqyaslı quruculuq işləri ilə bağlı Crossmedia.az-a açıqlama verib.
Onun sözlərinə görə, 1993-cü ildə Kəlbəcərin işğalı bölgənin tarixində ağır bir faciə kimi yadda qalıb. Minlərlə sakin erməni hərbi birləşmələri tərəfindən doğma torpaqlarını və evlərini tərk etməyə məcbur edilib.
P. Vəliyeva qeyd edib ki, insanlara cəmi 10 saat vaxt verilsə də, bu müddət belə dinc əhaliyə çox görülüb:
"511 kəlbəcərli qətlə yetirilmiş, 321 dinc sakin isə əsir götürülmüş və itkin düşmüşdür".
O bildirib ki, işğal dövründə Kəlbəcər əhalisi respublikanın 56 rayonunun 770 yaşayış məntəqəsində müvəqqəti məskunlaşıb.
Deputatın sözlərinə görə, işğal nəticəsində yüzlərlə tarixi abidə dağıdılıb, təbii sərvətlər talan edilib, məktəb, uşaq bağçaları, mədəniyyət evləri, kitabxanalar, muzeylər və xəstəxanalar məhv olunub, rayonun milyardlarla manatlıq sərvəti Ermənistana aparılıb.
Pərvanə Vəliyeva vurğulayıb ki, 2020-ci il Vətən müharibəsində əldə edilən tarixi Qələbə nəticəsində Azərbaycanın ərazi bütövlüyü bərpa olunub və 25 noyabr 2020-ci ildə Kəlbəcər sülh yolu ilə Azərbaycana qaytarılıb. Qarşı tərəf ərazini boşaltmaq üçün 10 gün vaxt istəsə də, geri çəkilərkən ətraf mühitə ciddi ziyan vurub, meşələri və evləri yandırıb, biomüxtəlifliyi məhv edib, mədəni artefaktları daşıyıb.
O, xatırladıb ki, 10 noyabr 2020-ci il tarixli Üçtərəfli Bəyanata əsasən Kəlbəcər rayonu noyabrın 25-də Azərbaycana təhvil verilib və Kəlbəcər şəhəri də daxil olmaqla 147 yaşayış məntəqəsi işğaldan azad edilib.
Deputat qeyd edib ki, Müzəffər Ali Baş Komandan İlham Əliyevin sərəncamları ilə Kəlbəcərin azad olunması uğrunda döyüşən yüzlərlə hərbi qulluqçu "Kəlbəcərin azad olunmasına görə" medalı ilə təltif olunub.
O əlavə edib ki, Prezident İlham Əliyevin tapşırıqları ilə azad edilmiş ərazilərdə sürətli bərpa işlərinin başlaması xalqda böyük ruh yüksəkliyi yaradıb və yeni inkişaf mərhələsini əsaslandırıb. Hazırda Kəlbəcərdə yeni yollar, tunellər, körpülər, yaşayış məhəllələri, təhsil və səhiyyə infrastrukturunun inşası həyata keçirilir. Laçın–Kəlbəcər və Tərtər–Kəlbəcər yolları bölgənin strateji əhəmiyyətini daha da artırır. İstisu kurort kompleksinin bərpası isə regionun turizm potensialının dirçəlməsinə xidmət edir.
Pərvanə Vəliyeva bildirib ki, bu layihələr Kəlbəcərin yaxın gələcəkdə Cənubi Qafqazın mühüm turizm və mədəniyyət mərkəzlərindən birinə çevriləcəyini göstərir.
Deputat həmçinin xatırladıb ki, Prezident İlham Əliyevin 31 iyul 2023-cü il tarixli Sərəncamı ilə işğaldan azad olunmuş ərazilər üzrə şəhər günləri təsis edilib və 25 noyabr Kəlbəcər şəhəri günü kimi müəyyən olunub.
Sonda Pərvanə Vəliyeva bildirib ki, Azərbaycan dövləti Kəlbəcəri yalnız bərpa etmir, onu müasir və inkişaf etmiş bir region kimi yenidən qurur. Bu isə bölgənin sosial-iqtisadi inkişafını daha da sürətləndirəcək:
"Kəlbəcərin azad olunmasında, eləcə də Azərbaycanın müstəqilliyi, ərazi bütövlüyü və suverenliyi uğrunda canından keçən bütün Şəhidlərimizin ruhu şad olsun! Qazilərimizə isə Allahdan can sağlığı diləyirik!"
Nigar Yahyazadə
13:44 25.11.2025
Oxunuş sayı: 1676
