Ermənistan nümayəndələrinin Azərbaycana səfərinə reaksiya: "Dostlaşıb - qardaşlaşmaq niyyəti..."
Ermənistan vətəndaş cəmiyyəti nümayəndələrinin Azərbaycana səfəri regionda sülh prosesinin yeni mərhələsinə keçidin mühüm göstəricilərindən biri kimi qiymətləndirilir. Bu səfər iki xalq arasında uzun illər davam edən qarşıdurma və etimadsızlığın azaldılması, qarşılıqlı dialoqun genişləndirilməsi baxımından əhəmiyyətli addım hesab olunur.
Mövzu ilə bağlı Crossmedia.az-a danışan siyasi şərhçi Azər Həsrət bildirib ki, əslində həm Ermənistan, həm də Azərbaycan vətəndaşlarının qarşılıqlı səfərləri zəruridir: "İki ölkə arasında münasibətlər də normallaşacaq. Amma bütün bunlar birdən baş verməyəcək. Ona qədər vətəndaş cəmiyyəti nümayəndələrinin, media təmsilçilərinin, ayrı-ayrı fəalların birgə oturub-durması, müzakirə aparması, fikir mübadiləsi etməsi və sülhün dayanıqlı olmasına töhfə verməsi vacibdir. Ona görə də Ermənistan ekspert heyətinin və vətəndaş cəmiyyəti nümayəndələrinin səfərini gərəkli hesab edirəm".
Şərhçinin sözlərinə görə, səfər həm vacib, həm də simvolik əhəmiyyət kəsb edir: "Daha əvvəl Azərbaycan nümayəndələri də Ermənistana səfər etmişdi. O səfərlərdən sonra Ermənistan mediasında və ictimai rəyində gedən müzakirələri izlədim. Ümumiyyətlə, Ermənistanda bu səfərlərə müsbət yanaşıldı. Hərçənd müəyyən gözdən salmaq cəhdləri də var idi. Azərbaycanda da eyni tendensiyanı görürük".
A.Həsrət əlavə edib ki, bu proses təmkinlə irəliləməlidir: "Ermənistan nümayəndələrinin gəlməsinə cəmiyyətimiz təmkinli yanaşır. Birdən-birə qucaq açmaq, mehribanlaşmaq, dostlaşıb - qardaşlaşmaq niyyəti yoxdur. Amma prosesin qaçılmaz olduğunu hamımız bilirik. Müharibə bitib, Ermənistan Azərbaycana qarşı iddialarından əl çəkib və rəhbərlik ən yüksək səviyyədə normal qonşu münasibətləri qurmaq niyyətini açıqlayıb. Azərbaycanın tələblərinin bir qismi yerinə yetirilib, qalanların da yerinə yetiriləcəyi barədə məlumat verilib".
Müsahibimiz vurğulayıb ki, sülhün dayanıqlı olması üçün xalqlar arasında qarşılıqlı etimadın təmin edilməsi vacibdir: "Bu etimadın formalaşmasında ön xəttdə vətəndaş cəmiyyəti nümayəndələri dayanır. Çünki onlar bu cür proseslərdə daha təcrübəli, anlayışlı və təmkinli olurlar. Bu yaxşı təcrübə sonradan xalqlar arasında etimadın yaradılmasına əlavə töhfə verir. Ona görə də bu səfəri yüksək qiymətləndirirəm və belə təşəbbüslərin davam etdirilməsinin faydalı olacağını düşünürəm".
Mehriban Yariyeva
17:38 24.11.2025
Oxunuş sayı: 2260
