Hazırkı Ukrayna ilə 90-cı illərin Azərbaycanı arasında analogiya - Mühüm lider fenomeni
Müasir beynəlxalq münasibətlərdə sülhün təmin edilməsi, münaqişələrin qarşısının alınması və dövlətlərin təhlükəsizliyinin möhkəmləndirilməsi birbaşa siyasi liderliyin gücündən asılıdır. Ukrayna üçün təqdim olunan sülh planı ətrafında gedən müzakirələr də göstərir ki, qətiyyətli, strateji viziona sahib liderlik ölkələrin taleyində həlledici rol oynayır. Azərbaycan təcrübəsi — xüsusilə Prezident İlham Əliyevin 30 illik işğal dövründə və ondan sonrakı mərhələdə həyata keçirdiyi ardıcıl, prinsipial siyasət — bunun ən parlaq nümunəsidir.
Uzun illər boyu Azərbaycan beynəlxalq arenada haqq səsini çatdırmağa çalışsa da, özünü qlobal təhlükəsizliyin “qarantı” kimi təqdim edən qüvvələr bu çağırışları bilərəkdən görməzdən gəlirdi. Lakin güclü iradə, davamlı siyasi xətt və milli maraqlara söykənən mövqeyin nəticəsidir ki, Azərbaycan möhkəmləndi, haqlı tələbləri dünya tərəfindən qəbul olundu və ölkə öz gücü ilə ərazi bütövlüyünü bərpa etdi. Bu gün artıq aydın görünür ki, dövlətin uğuru ilk növbədə liderin iradəsi və strateji baxışından asılıdır. Elə buna görə də ekspertlər Ukraynanın faciəsinin əsas səbəblərindən birini güclü, birləşdirici liderliyin olmamasında görürlər.
Mövzu ilə bağlı Crossmedia.az-a açıqlama verən Milli Məclisin deputatı Azər Badamov bildirib ki, lider amili ölkənin və xalqın taleyinin müəyyənləşdirilməsi baxımından xüsusi əhəmiyyət daşıyır. Onun sözlərinə görə, dünyada müharibə ocaqlarının, ictimai-siyasi gərginliklərin artdığı bir zamanda dövlətin suverenliyini qorumaq, ədalətli mövqeyi beynəlxalq aləmdə qəbul etdirmək, daxili sabitliyi təmin etmək və ölkəni inkişaf yoluna çıxarmaq hər bir dövlət başçısının bacarığı deyil:
“Buna görə də çox zaman ədalət tapdalanır, ölkələrin suverenliyi pozulur, xalqlar qaçqın və məcburi köçkün vəziyyətinə düşür, dövlətlər tənəzzülə uğrayır".
Deputat xatırladıb ki, 90-cı illərin əvvəllərində Azərbaycan da belə ağır vəziyyətlə üzləşmişdi. Torpaqlarının 20%-i işğal altında olduğu və 1 milyon qaçqın-məcburi köçkün problemi mövcud olduğu halda beynəlxalq ictimaiyyət ölkəmizə qarşı qərəzli mövqe nümayiş etdirir, Azərbaycan sanki işğalçı kimi təqdim olunurdu:
“Bu, ölkənin lidersizliyinin xalqımıza yaşatdığı ağır tarixi günlər idi. Lakin 1993-cü ildə Ulu Öndər Heydər Əliyevin hakimiyyətə qayıdışı və 2003-cü ildə İlham Əliyevin Prezident seçilməsi Azərbaycanı bütün bəlalardan xilas etdi və xalqımızı öz taleyinin sahibi etdi".
A.Badamov vurğulayıb ki, Prezident İlham Əliyevin liderliyi nəticəsində Azərbaycan həm siyasi, həm də iqtisadi müstəqilliyə qovuşdu, 30 il işğal altında olan torpaqlarını döyüş meydanında azad edərək beynəlxalq hüququ bərpa edən qalib ölkəyə çevrildi:
“Güclü lider sayəsində Azərbaycanın haqq səsi dünyaya qəbul etdirildi və nəticədə sülh gündəliyimiz düşmənə də qəbul etdirildi. Prezident İlham Əliyev 44 günlük müharibə dövründə informasiya cəbhəsində də qətiyyətlə mübarizə apardı, 40-dan çox beynəlxalq media qurumuna müsahibə verərək ölkəmizə qarşı dezinformasiya səddini dağıtdı. Hər bir lider praqmatik düşüncəyə, dəyişməz mövqeyə, güclü siyasi iradəyə və düzgün qərar vermək qabiliyyətinə sahib olmalıdır. Dövlətin milli maraqları və təhlükəsizliyi isə lider üçün hər şeydən üstün olmalıdır. Yalnız bu halda ölkə xarici təsirlərdən qorunur və suverenliyini qoruya bilir. Bu gün liderlik böhranı yaşayan ölkələrdən biri də Ukraynadır. Ukraynanın taleyinə dair əsas qərarların ölkə xaricində verilməsi, torpaqlarının 20%-ni itirməsi və gələcəyinin qeyri-müəyyən qalması, məhz ölkədə qətiyyətli, xalqı arxasınca apara biləcək liderliyin olmamasından qaynaqlanır. Liderin olmaması xalqları faciəyə aparır".
Bunun fonunda Azərbaycan xalqının öz lideri ətrafında birləşdiyini bildirən deputat əlavə edib ki, bu gün ölkəmizdə sabitlik, inkişaf və firavanlıq mövcuddur:
“Xalqımızın Prezident İlham Əliyevə inamı sonsuzdur. Heç kim şübhə etmir ki, Azərbaycan bundan sonra da öz liderinin rəhbərliyi altında daha böyük nailiyyətlərə imza atacaq".
Mehriban Yariyeva
17:33 24.11.2025
Oxunuş sayı: 11308
