Azərbaycan - İran əlaqələrində yeni dinamika: Əraqçinin müavinini Bakıya gətirən səbəblər
Azərbaycan xarici işlər naziri Ceyhun Bayramov Azərbaycanda səfərdə olan İranın xarici işlər nazirinin müavini Vahid Cəlalzadəni qəbul edib.
Görüş zamanı iki ölkə arasında ikitərəfli və çoxtərəfli əməkdaşlıq gündəliyi, eləcə də regional məsələlər müzakirə olunub.
Azərbaycanla İran arasında dost münasibətlərin inkişafında ölkə liderləri arasında təmasların, o cümlədən mövcud siyasi dialoqun və Parlamentlərarası əlaqələrin vacibliyi, ümumi maraq kəsb edən məsələlərin müzakirəsinin əməkdaşlığın genişləndirilməsinə töhfə verdiyi vurğulanıb. İran İslam Respublikasının Prezidenti Məsud Pezeşkianın ölkəmizə bu il həyata keçirdiyi iki səfərin münasibətlərə əlavə təkan verdiyi qeyd olunub.
İki ölkə arasında siyasi, iqtisadi, ticarət, enerji təhlükəsizliyi, nəqliyyat və kommunikasiyalar sahələri üzrə əməkdaşlığın perspektivlərini müzakirə edən tərəflər, xüsusilə Azərbaycan və İran tərəfindən icra olunan bir sıra layihələrin regionumuzdan keçən nəqliyyat dəhlizlərinin inkişafında mühüm rol oynadığını bildiriblər.
Görüşdə, həmçinin qarşılıqlı maraq doğuran digər məsələlər ətrafında fikir mübadiləsi aparılıb.
Bu kontekstdə ikitərəfli münasibətlərin mövcud durumu barədə Crossmedia.az-a danışan keçmiş xarici işlər naziri Elmar Məmmədyarov söyləyib ki, qonşuluq siyasətinə ciddi yanaşmaq lazımdır: "Həm Azərbaycan, həm də İran bunu başa düşürlər. Ona görə də, xeyli müddət ərzində fərqli sahələrdə müxtəlif layihələr həyata keçirilir. Azərbaycan əlaqələrin inkişafında maraqlıdır. Çünki İran qonşumuzdur, orada xeyli azərbaycanlı yaşayır. Ümumiyyətlə, iqtisadi- siyasi inkişaf qonşuluq üçün faydalıdır".
Röya Məmmədova
16:48 24.11.2025
Oxunuş sayı: 4772
