Ukraynaya qırıcı təchizatı sazişi qeyri-mümkündür
Fransanın “Vətənpərvərlər” partiyasının lideri Florian Filippо Ukraynaya Rafale qırıcısı təchizatı ilə bağlı sazişi qeyri-mümkün adlandırıb.
Crossmedia.az xarici mediaya istinadən xəbər verir ki, Filippо öz sosial şəbəkə hesabında “Bu hətta razılaşma deyil, niyyət məktubudur və çox zəif səviyyəli sənəddir”,- deyə yazıb. Onun sözlərinə görə, Ukraynanın 100 Rafale təyyarəsi almaq üçün maliyyə vəsaiti yoxdur və bu səbəbdən qırıcılar birbaşa Kiyevə satıla bilməz.
O əlavə edib ki, “Bu halda ödənişi kim edəcək? Yenə fransızlar ödəyəcək, onların da vəsaiti yetərli deyil. Bundan əlavə, Fransız ordusunun özündə kifayət qədər qırıcı təyyarə yoxdur”.
Filippо həmçinin narahatlığını ifadə edib ki, Ukrayna üçün təyyarələrin ödənilməsi Fransadakı iqtisadi vəziyyəti pisləşdirəcək və dövlət borcunun artmasına səbəb olacaq. “Görünür, Ukrayna heç vaxt bu təyyarələrin əvəzini ödəməyəcək, buna görə də söhbət birbaşa Fransaya zərərdən gedir”, – o vurğulayıb.
Nigar Yahyazadə
19:02 17.11.2025
Oxunuş sayı: 1273
