Baykar KIZILELMA-nın 5-ci prototipini TOYGUN sistemi ilə uğurla sınaqdan keçirdi
Türkiyənin Baykar şirkəti Bayraktar KIZILELMA döyüşücü pilotsuz təyyarəsinin beşinci prototipini sınaqdan keçirib. Məlumatı SavunmaSanayiST.com sosial şəbəkə X-də yayıb.
Crossmedia.az xəbər verir ki, ASELSAN tərəfindən hazırlanan TOYGUN optik-elektron nişangah sisteminin inteqrasiyası tam olaraq başa çatıb. Uçuş testləri sabit görüntü ötürülməsini, hədəflərin dəqiq izlənməsini və lazer nişanlamasında yüksək dəqiqliyi təsdiqləyib.
Bildirilib ki, sistem bort komputerilə fasiləsiz məlumat mübadiləsi aparıb və çətin şəraitdə belə stabil fəaliyyət göstərərək ardıcıl inteqrasiya üçün tələb olunan göstəriciləri doğruldub.
Bu sınaq, döyüş təyinatlı pilotsuz aparatlarda EOTS sisteminin ilk dəfə fuselyajın daxilinə yerləşdirilərək tətbiqi kimi dünya üzrə bir ilk hesab olunur. Sisteminin daxildə qurulması KIZILELMA-nın radara görünməzlik səviyyəsini artırır.
Uğurlu inteqrasiyadan sonra Türkiyə bu texnologiyaya sahib olan dünyada cəmi üç ölkədən biridir. TOYGUN EOTS əvvəllər yalnız beşinci nəsil döyüş platformalarında tətbiq edilirdi.
TOYGUN sistemi genişzolaqlı skan etmə, yüksək təsvirli infraqırmızı görüntüləmə və süni intellekt əsaslı hədəf izləmə-sinifləndirmə imkanları ilə KIZILELMA-nın avtonom qabiliyyətlərini daha da gücləndirir.
Sevinc Yarməmmədova
17:40 17.11.2025
Oxunuş sayı: 1182
