Xəzərdə yenidən suiti faciəsi
Xəzər dənizində yenidən suiti ölümü müşahidə olunur. Bu, son illər ərzində dəfələrlə təkrarlanan və narahatlıq doğuran ekoloji hadisələrdən biridir. Qazaxıstanın Manqistau vilayətinin Ekologiya Departamentinin əməkdaşları dənizin həmin bölgəsində aparılan monitorinq zamanı sahilə çıxmış 112 suiti cəsədi aşkarlayıblar.
Crossmedia.az xarici KİV-ə istinadən xəbər verir ki, hadisə yerinə dərhal mütəxəssislər cəlb olunub, dəniz suyundan və torpaqdan nümunələr götürülərək laboratoriya analizlərinə göndərilib.
Mütəxəssislər suiti ölümünün mümkün səbəbləri kimi ekoloji çirklənmə, oksigen çatışmazlığı, su temperaturunun dəyişməsi, eləcə də insan təsərrüfatı fəaliyyəti nəticəsində yaranan kimyəvi tullantıları istisna etmirlər.
Eyni zamanda, oxşar mənzərə Xəzərin Azərbaycan sahillərində də müşahidə olunur. Bakıətrafı qəsəbələrdə, xüsusilə Pirşağı sahilində həm böyüklərə, həm də balaca suitilərin cəsədləri tapılıb. Yerli sakinlər bildirirlər ki, son günlər dənizdə qəribə qoxu hiss olunur və suyun rəngində də dəyişiklik müşahidə edilir.
Türkanə Məşədiyeva
11:08 04.11.2025
Oxunuş sayı: 1358
