Qubadlının azad olması sosial və mədəni baxımından da əhəmiyyət kəsb edir - Deputat
2020-ci il oktyabrın 25-də işğaldan azad edilən Qubadlıda bərpa və quruculuq işləri sürətlə gedir. İllərlə dayanan həyat indi yenidən canlanır: yollar tikilir, infrastrukturlar bərpa olunur və sakinlərin geri dönməsi üçün hərtərəfli hazırlıqlar görülür. Qubadlı həm tarixini, həm də gələcəyini bərpa etməyə davam edir.
Bu barədə Milli Məclisin deputatı Pərvanə Vəliyeva Crossmedia.az -a açıqlamasında bildirib: "Bu gün Azərbaycan xalqı üçün xüsusi günlərdən biridir. 25 oktyabr 2020-ci ildə Azərbaycan Ordusu Qubadlı şəhərini işğaldan azad etmişdir. 1993-cü ildən Ermənistanın işğalı altında olan rayonun azad olunması həm tarixi ədalətin bərpası, həm də ərazi bütövlüyümüzün təmin olunması baxımından böyük əhəmiyyət kəsb edir".
P. Vəliyeva qeyd edib ki,1988-ci ildən başlayaraq Qubadlı rayonuna Ermənistan tərəfindən təcavüzkar hücumlar edilmişdir: "1993-cü il avqustun 31-də rayon tamamilə işğal olunmuş və minlərlə sakin doğma yurd-yuvasından didərgin düşmüşdür".
O vurğulayıb ki,işğal nəticəsində rayondakı yaşayış məntəqələri, fərdi evlər, inzibati binalar, sosial və mədəniyyət obyektləri, məscidlər, körpülər dağıdılmış, kənd təsərrüfatı obyektləri, avtomobil yolları, su anbarları, elektrik xətləri və qaz boru xətləri məhv edilmişdir: "Buna baxmayaraq, 27 il ərzində Qubadlı sakinləri doğma torpaqlarına qayıtmaq ümidini itirməmişdir”.
Pərvanə Vəliyeva qeyd edib ki, 2020-ci ilin Vətən müharibəsi zamanı Azərbaycan Ordusu yüksək peşəkarlıq və fədakarlıq nümayiş etdirərək strateji yüksəklikləri və kəndləri ələ keçirmiş, oktyabrın 25-də isə şəhəri tamamilə düşməndən təmizləyərək üçrəngli bayrağımızı qürurla dalğalandırmışdır: "Qubadlının azad olunması yalnız hərbi baxımdan deyil, həm də sosial və mədəni baxımdan böyük əhəmiyyət kəsb edir”.
Deputat bildirib ki, hazırda Qubadlıda yenidənqurma və bərpa işləri geniş vüsət alıb: “Yeni infrastruktur layihələri, yollar, məktəblər, xəstəxanalar və müasir yaşayış məhəllələri inşa olunur. Zilanlı kəndində modern memarlıq əsasında yeni yaşayış məhəlləsi planlaşdırılır. Mədəni obyektlər, inzibati binalar, məktəblər, ‘Rayon Mədəniyyət Mərkəzi’ və müzey kompleksi üçün layihələr hazırlanıb. 2025-ci ildə keçirilmiş ‘Rebuild Karabakh – 2025’ sərgisi çərçivəsində bərpa layihələri ictimaiyyətə təqdim olunmuşdur”.
O qeyd edib ki, perspektivdə rayonda ekoturizm, kənd təsərrüfatı və yeni suvarma texnologiyalarının inkişafı planlaşdırılır: "Əhalinin geri qayıdışı, mənzil mövcudluğu və sosial infrastrukturun işə salınması sahələrində zaman tələb olunur. Qubadlı rayonu işğaldan azad edildikdən sonra yenidənqurma, inkişaf və transformasiya mərhələsindədir. Yeni inkişaf modeli dayanıqlı, yaşanılabilir və təbiətlə uzlaşan prinsiplər üzərində qurulur".
Mehriban İbrahimli
16:44 24.10.2025
Oxunuş sayı: 1195
