Yeni Konstitusiyanın qəbul olunması barədə 2018-ci ildən etibarən danışırıq - Mirzoyan
“Vaşinqton Bəyannaməsində Ermənistan və Azərbaycan kommunikasiya xətlərinin açılması prosesi ilə bağlı əsas prinsiplər üzərində razılığa gəliblər və bu, olduqca vacibdir”.
Crossmedia.az xəbər verir ki, bunu Almaniyanın DW nəşrinə verdiyi müsahibəsində Ermənistanın xarici işlər naziri Ararat Mirzoyan bildirib.
Onun sözlərinə görə, bu, son dərəcə vacibdir və bütün danışıqlar prosesinin ən mühüm aspektlərindən biridir.
Mirzoyan vurğulayıb ki, Ermənistan ərazisində yerləşən infrastruktur Ermənistanın yurisdiksiyası altında, Azərbaycan ərazisində yerləşən infrastruktur isə Azərbaycanın yurisdiksiyası altında fəaliyyət göstərməlidir.
“Biz həmçinin sülh sazişinin ilkin variantını da imzalamışıq və bu, çox, çox vacibdir. Paralel olaraq, yerində proseslər də gedir. Məsələn, biz dövlət sərhədinin delimitasiyasına başlamışıq. Artıq 12 kilometrlik sərhəd xətti müəyyən olunub. Bu, misilsiz hadisədir. Həmçinin prosesin necə davam etməli olduğu ilə bağlı qarşılıqlı anlaşmamız da var, biz prinsiplər üzərində razılığa gəlmişik”, - deyə erməni nazir qeyd edib.
Mirzoyan deyib ki, bu, asan proses deyil, əks halda hər şey çoxdan tamamlanardı.
O ehtimal edib ki, sərhədin delimitasiyası eyni templə davam edəcək, hətta bəlkə də daha da sürətlənəcək.
“Nəqliyyat əlaqələrinə gəldikdə isə, şərtləri necə razılaşdırmaq lazımdır? Ermənistan və Amerika Birləşmiş Ştatları dəmir yolunun bir hissəsinin taleyi ilə bağlı razılığa gəliblər. Həmin hissə tikilməli və daha sonra ABŞ-Ermənistan konsorsiumu tərəfindən saxlanılmalıdır. Bu konsorsium, məsələn, gündəlik əməliyyatları həyata keçirmək üçün üçüncü bir şirkəti icarəyə götürə bilər.
Nəqliyyat əlaqələri ilə bağlı növbəti addım bu şərtlər üzərində razılığın əldə olunması, daha sonra isə dəmir yolunun qalan hissəsinin tikintisinə başlanması olacaq. Bu, həm də boru kəməri ola bilər, lakin burada biz sıfırdan başlamalıyıq.
Növbəti mərhələ sülh sazişinin imzalanmasıdır. Lakin burada bir məqam var: təəssüf ki, Azərbaycan tərəfi sülh sazişinin imzalanması üçün müəyyən ilkin şərtlər irəli sürür. Biz bununla razı deyilik, bizim əks arqumentlərimiz var. Amma onlar hesab edirlər ki, bizim Konstitusiyamızla bağlı problem mövcuddur, bu, onların mövqeyidir.
Onlar istəyirlər ki, biz Konstitusiyanı dəyişək. Bu, bizim rədd etdiyimiz bir şərtdir. Eyni zamanda, bizdə Konstitusiyanın dəyişdirilməsi və ya yeni Konstitusiyanın qəbul olunması gündəliyi mövcuddur, bu barədə biz siyasi bəyanat vermişik.
Ermənistan Konstitusiyasında Azərbaycanın əleyhinə ərazi iddialarını göstərən heç nə yoxdur.
Azərbaycan tərəfinin qaldırdığı məsələ, sadəcə, mövcud deyil. Lakin Azərbaycan burada problem görür və buna görə də ilkin şərtlər irəli sürüb. Biz bu şərtlə razı deyilik, lakin dediyim kimi, Ermənistanın yeni Konstitusiyasının dəyişdirilməsi və ya qəbul olunması barədə biz 2018-ci ildən etibarən onsuz da danışırıq. Komissiya artıq işini yekunlaşdırmaq üzrədir və çox güman ki, bu məsələ ilə bağlı referendum 2026-cı il parlament seçkilərindən sonra keçiriləcək.
Biz sülh sazişini dərhal imzalamağa hazırıq”, - deyə Mirzoyan qeyd edib.
09:51 18.10.2025
Oxunuş sayı: 1313
