Uşakov: Tramp Zelenski ilə görüşdə Putinin təkliflərini nəzərə alacaq
Rusiya prezidentinin köməkçisi Yuri Uşakov bildirib ki, sabah ABŞ-ın prezidenti Donald Trampın Ukrayna lideri Volodimir Zelenski ilə keçirəcəyi görüşdə, o, Vladimir Putinlə son telefon danışığında səsləndirilən bütün təklif və mülahizələri nəzərə alacaq.
Bu barədə Crossmedia.az xarici mediaya istinadən xəbər verir.
Uşakovun sözlərinə görə, Putin və Tramp cümə axşamı günü 2,5 saat davam edən, sayca səkkizinci telefon danışığını keçiriblər. Danışıq Rusiyanın təşəbbüsü ilə baş tutub və əsas diqqət Ukrayna böhranına yönəlib.
Putin söhbət zamanı Ukraynadakı vəziyyətə dair ətraflı qiymətləndirmələr verib və Rusiya Silahlı Qüvvələrinin bütün cəbhə xətti boyunca strateji təşəbbüsə malik olduğunu bildirib. O, həmçinin Ukraynada vəziyyətin siyasi-diplomatik yolla nizamlanmasına sadiqliyini vurğulayıb.
Tramp isə öz növbəsində münaqişələrin həllindəki təcrübəsini xatırladaraq qeyd edib ki, Ukrayna münaqişəsinin başa çatması Rusiya və ABŞ arasında iqtisadi əməkdaşlıq üçün böyük perspektivlər açacaq.
Söhbət zamanı tərəflər həmçinin hər iki ölkə xalqları arasında xoş münasibətlərdən danışıblar. Putinin sözlərinə görə, ABŞ-ın Ukraynaya “Tomahawk” raketlərinin tədarükü məsələsi də müzakirə olunub. Rusiya lideri qeyd edib ki, bu cür silahların Kiyevə verilməsi cəbhədə vəziyyəti dəyişməyəcək, lakin Moskva və Vaşinqton arasındakı münasibətlərə ciddi zərbə vuracaq.
Uşakov əlavə edib ki, Putin və Tramp şəxsi görüşün keçirilməsi imkanını da müzakirə ediblər. Rusiya və ABŞ nümayəndələri sammitin hazırlıqlarına dərhal başlayacaqlar. Bu istiqamətdə ilk addım kimi Rusiya xarici işlər naziri Sergey Lavrovun və ABŞ tərəfdən Marko Rubionun telefon əlaqəsi planlaşdırılır.
Tramp görüş yeri kimi Budapeşti təklif edib və Putin bu təklifi dəstəkləyib. Sammitin mümkün tarixləri yaxın vaxtlarda iki ölkə nümayəndələri arasında müzakirə olunacaq.
Putin söhbətin sonunda Trampdan həyat yoldaşı Melaniyaya ən xoş arzularını çatdırmağı xahiş edib və rus və ukraynalı uşaqların ailələri ilə birləşdirilməsi məsələsində onun iştirakına görə təşəkkürünü bildirib.
Hər iki lider yaxın gələcəkdə əlaqəni davam etdirmək barədə razılığa gəlib.
Mehriban İbrahimli
23:16 16.10.2025
Oxunuş sayı: 8557
