Ramiz Mehdiyev villasında yox, türmədə olmalıdır - Partiya sədri
Prezident Adminisitrasiyasının sabiq rəhbəri Ramiz Mehdiyevin dövlətə xəyanət ittihamı ilə həbsi ölkə gündəminin əsas müzakirə mövzusuna çevrilib. Uzun illər Azərbaycan siyasi həyatında mühüm rol oynamış bir şəxsə qarşı belə ağır ittihamın irəli sürülməsi cəmiyyətdə geniş rezonans doğurub. Bu hadisə göstərir ki, istənilən vəzifədə olmuş şəxsin neqativ hərəkətlər törətməsi onu məsuliyyətdən kənarda saxlaya bilməz və dövlət maraqlarına qarşı çıxan hər kəs qanun qarşısında cavab verməlidir.
Mövzu ilə bağlı Crossmedia.az-a açıqlamasında Ağ Partiya sədri Tural Abbaslı bildirib ki, əslində Ramiz Mehdiyev hələ tam mənada həbs olunmayıb: “Əvvəl gəlin bunu dəqiqləşdirək: düzdür, mediada yazılır ki, Ramiz Mehdiyev həbs olunub, amma o ev dustaqlığındadır. Bu da hüquqi baxımdan həbs qəti imkan tədbiri sayılır, amma dünən məlum oldu ki, Mehdiyevin həm mobil telefona, həm internetə çıxışı var, həm də istədiyi insanlarla əlaqə saxlaya bilir. Bu da o deməkdir ki, onun üçün ‘həbs’ anlayışı kağız üzərində qalıb. Adam evində oturub və əvvəl nə işlə məşğul idisə, indi də eyni işlərlə məşğuldur".
Tural Abbaslı hesab edir ki, bu vəziyyət yolverilməzdir və Mehdiyev dərhal təcrid olunmalıdır: “Mən bir müxalifət partiyasının rəhbəri kimi aidiyyəti qurumlardan Mehdiyevin dərhal təcrid edilməsini, onun ya birbaşa saxlanma müəssisəsinə, ya da sağlamlığı yol vermirsə, penitensiar xidmətin xəstəxanasına yerləşdirilməsini tələb edərdim. Bu adam həbs olunmalıdır — el dilində desək, türmədə olmalıdır, villasında yox. 20 milyonluq villada oturub ‘həbs olunmuşam’ deməklə bu məsələ bağlanmır".
Partiya sədri həmçinin qeyd edib ki, Mehdiyevin ailə üzvləri hələ də yüksək vəzifələrdə çalışır və bu da prosesin tam başa çatmadığını göstərir: “Onun oğlu general-mayordur və strateji bir nazirlikdə müavindir, qızı isə Bakı Dövlət Universitetində kafedra müdiridir. Mən düşünürəm ki, Mehdiyev hələ neytrallaşdırılmayıb, tam təcrid olunmayıb və istintaqa təsir etmək imkanları qalır. Odur ki, ‘Ramiz Mehdiyev cəzalandırıldı’ demək hələ tezdir".
Tural Abbaslının fikrincə, bu proses təkcə bir şəxsin məsuliyyətə cəlb edilməsi ilə yekunlaşmamalıdır: “Mehdiyev, Həsənov, Məmmədov, Quliyev — kim olur-olsun, fərqi yoxdur, əgər Cinayət Məcəlləsində nəzərdə tutulan əməlləri törədibsə, hamısı cəzalandırılmalıdır. Biz illərlə öyrəşmişik ki, imtiyazlı adamlar qanundan üstün olublar. Amma qanun hamıdan üstün olmalıdır. Heç kim özünü qanundan üstün bilməməlidir. Şəxslər gəlib gedir, amma dövlət və qanun qalır".
Ağ Partiya sədri hesab edir ki, Mehdiyev ətrafında ittihamlar təkcə onunla məhdudlaşmır və bu, daha geniş miqyaslı bir prosesin başlanğıcı ola bilər: “Əgər ittihamda ‘hakimiyyəti zorla ələ keçirmək və ya saxlamaq’ maddəsi varsa, deməli, burada artıq mütəşəkkil bir cinayətkar qrupdan söhbət gedir. 87 yaşlı bir qoca təkbaşına bunu həyata keçirə bilməz. Mən hesab edirəm ki, bu işdə başqa şəxslər də var və onların da həbs olunması gözləniləndir".
Sonda Tural Abbaslı əlavə edib ki, Ramiz Mehdiyevin həbsi ilə bağlı hələ yekun nəticə çıxarmaq tezdir: “Nə dəyişəcək, bunu zaman göstərəcək. Əsas məsələ odur ki, bu hadisə dövlət idarəçiliyində yeni bir mərhələnin başlanğıcı olsun. Kimliyindən asılı olmayaraq, qanunu pozan hər kəs cavab verməlidir. ‘Şah mənəm, qanun mənəm’ düşüncəsi aradan qalmasa, dövlətçilik prinsipləri də möhkəmlənməyəcək".
Mehriban Yariyeva
20:15 16.10.2025
Oxunuş sayı: 9802
