Avropa Komissiyası Rusiyadan gələ biləcək təhlükələrə qarşı “flagma”n müdafiə layihələrini təqdim edib
Avropa Komissiyası Rusiyadan potensial təhdidlərin qarşısını almaq məqsədilə yeni “flagma”n müdafiə layihələrini təqdim edib.
Bu barədə Crossmedia.az "Reuters" agentliyinə istinadən xəbər verir ki, yeni təşəbbüslər Avropa İttifaqının müdafiə siyasətinə dair “yol xəritəsi”ndə yer alıb və Rusiyanın Ukraynaya qarşı müharibəsindən, eləcə də Moskvanın Aİ-yə qarşı mümkün hücum təhlükəsindən doğan narahatlıqları əks etdirir.
Avropa İttifaqının ali diplomatı Kaja Kallas bildirib:
"Ukraynada müharibə başa çatdıqdan sonra belə təhlükə aradan qalxmayacaq. Aydındır ki, Rusiyaya qarşı müdafiəmizi gücləndirməliyik.”
Avropa Komissiyasının məlumatına görə, dörd əsas layihədən ikisi ən yüksək prioritet hesab olunur:
Avropa dronlara qarşı təşəbbüsü (“Dron divarı”) – pilotsuz uçuş aparatlarından müdafiə sistemi,
Eastern Flank Watch – Aİ-nin şərq sərhədlərinin qurudan, havadan və dənizdən möhkəmləndirilməsi məqsədini daşıyan proqram.
Hər iki layihənin ilkin hazırlıq mərhələsinin gələn ilin sonuna qədər başa çatdırılması planlaşdırılır. Dronlara qarşı müdafiə sistemi tam şəkildə 2027-ci ildə, Eastern Flank Watch proqramı isə 2028-ci ilin sonuna qədər tam fəaliyyətə keçməlidir.
Bundan əlavə, Aİ planında Avropa Hava Qalxanı – raket və digər hava təhlükələrindən müdafiə sistemi, həmçinin Avropa Kosmik Qalxanı – Avropanın kosmik aktivlərini və xidmətlərini qorumaq üçün nəzərdə tutulan təşəbbüslər də yer alır.
Gözlənilir ki, bütün Aİ ölkələrinin liderləri bu layihələrin dəstəklənməsi barədə qərar qəbul edəcək və hər bir proqramın koordinasiyasına hansı dövlətlərin cavabdeh olacağını müəyyənləşdirəcəklər.
Fatimə
18:57 16.10.2025
Oxunuş sayı: 1367
