Aqil Abbas: Türk dövlətlərinin gələcəkdə ortaq dil və əlifbaya keçəcəkləri gözlənilir
Türk Dövlətləri Təşkilatına (TDT) üzv və müşahidəçi ölkələrin diaspor qurumlarının rəsmiləri II "INTERNSHIP" (təcrübə) proqramı çərçivəsində Şuşa və Xankəndiyə səfər ediblər.
Qonaqlar əvvəlcə Şuşada olub, Cıdır düzü, Güllələnmiş heykəllər, Şuşa qalası, Gəncə qapısı, İsa bulağı və Yuxarı Gövhər Ağa məscidini ziyarət ediblər.
Onlara şəhərin tarixi və Şuşada Azərbaycanın mədəni irsinə qarşı erməni vandalizmi haqqında məlumat verilib. Təcrübə proqramının iştirakçıları şəhərdə aparılan sürətli bərpa və yenidənqurma işlərini yüksək qiymətləndiriblər.
Xankəndidə Qarabağ Universitetində görüş zamanı universitetin elmi-tədqiqat istiqamətləri və beynəlxalq əməkdaşlıq imkanları barədə geniş fikir mübadiləsi aparılıb. Daha sonra Zəfər meydanını ziyarət edən qonaqlara şəhərin tarixindən, mövcud vəziyyətindən, sosial və mədəni həyatından danışılıb. Xankəndinin strateji əhəmiyyəti, həyata keçirilən bərpa işləri və gələcək inkişaf perspektivləri diqqətə çatdırılıb.
Diaspor komitələri arasında münasibətlərin TDT-yə üzv ölkələr arasında inteqrasiyaya təsiri barədə Crossmedia.az-a danışan Milli Məclisin deputatı Aqil Abbas söyləyib ki, Türk dövlətləri getdikcə birləşir: "Türk dövlətlərinin gələcəkdə ortaq dil və əlifbaya keçəcəkləri gözlənilir. Bu proses çərçivəsində sərhədlərin açıq olması və orduların birləşdirilməsi planlaşdırılır, amma bu məsələ uzun çəkə bilər. Türk dövlətlərinin Qarabağda tikinti və sosial layihələrini – bağça, məktəb və xəstəxanaları açdırması onların bizə olan münasibətini açıq aşkar göstərir".
Fidan Quliyeva
16:46 16.10.2025
Oxunuş sayı: 1179
