Paşinyan: Ermənistan və Azərbaycan arasında sülh bərqərar olub
“Ermənistan və Azərbaycan Kopenhagen görüşündən sonra hər iki tərəfin dərc etdiyi bəyanatı rəsmi olaraq qəbul ediblər. Məsələləri şərh edərkən biz şifahi bəyanatlara deyil, yazılı sənədlərə əsaslanmalıyıq”.
Crossmedia.az xəbər verir ki, bunu oktyabrın 16-da jurnalistlərlə söhbətində Ermənistanın baş naziri Nikol Paşinyan bildirib.
Onun sözlərinə görə, Kopenhagen görüşünün nəticələrinə dair bəyanatda qeyd olunur ki, Ermənistan ərazisində kommunikasiyalar və TRIPP proqramı məsələsi müzakirə olunub.
“Beləliklə, hər iki tərəf Ermənistan ərazisində TRIPP proqramının olduğunu qeydə alıb və bununla da biz əlavə olaraq Ermənistanın rəsmi mövqeyini bir daha təsdiq etmiş oluruq ki, Ermənistan ərazisində “Sülh kəsişməsi” və TRIPP proqramlarından başqa heç bir proqram yoxdur. Çünki bu mövzu daim müzakirə olunur, düzgün prinsip yazılı sənədlərə əsaslanmaqdır.
Ümumiyyətlə, mən Kopenhagendəki müzakirələrimizdən, təmaslarımızdan və sülhün institusionallaşdırılması istiqamətində görülən işlərdən razıyam. Bir daha vurğulamaq istərdim ki, Ermənistan və Azərbaycan arasında sülh bərqərar olub. Bu, danılmaz faktdır”, - deyə Ermənistan hökumətinin rəhbəri qeyd edib.
16:09 16.10.2025
Oxunuş sayı: 6870
