Qarabağda minaların təmizlənməsi prosesi ən azı 30 il çəkə bilər - Proqnoz
Avropa İttifaqı azad olunan ərazilərin minalardan təmizlənməsi sahəsində Azərbaycana dəstəyini davam etdirəcək.
Avropa İttifaqının (Aİ) Azərbaycandakı nümayəndəliyinin yeni təyin olunmuş rəhbəri Mariyana Kuyundziç bu gün Prezident İlham Əliyevin qəbulunda olarkən deyib ki, Aİ azad olunan ərazilərin minalardan təmizlənməsi sahəsində Azərbaycana dəstəyini davam etdirəcək.
Görüşdə həmçinin Azərbaycan-Aİ əlaqələrinin perspektivlərinə dair fikir mübadiləsi aparılıb.
Aİ rəsmiləri əvvəllər də oxşar açıqlamalar veriblər. Maraqlıdır, qurum nə qədər səmimidir? Aİ "baş altına yastıq qoyur", yoxsa artıq rəsmi Bakının maraqlarını nəzərə alır?
Bu barədə Crossmedia.az-a danışan Vətəndaş Partiyasının sədri Sabir Rüstəmxanlı Crossmedia.az -a açıqlama verib
O qeyd edib ki, Qarabağda minaların təmizlənməsi prosesi ən azı 30 il çəkə bilər: "ANAMA-nın hazırkı fəaliyyəti göstərir ki, minalar əsasən Qarabağın əksər rayonlarında geniş şəkildə basdırılıb. Bu isə təmizləmə işlərinin miqyasını və çətinliyini bir daha ortaya qoyur. Beynəlxalq ictimaiyyət artıq Qarabağın Azərbaycan torpağı olduğunu qəbul edir, Ermənistanın işğalçı kimi tanındığı fakt da danılmazdır. Azərbaycan diplomatik müstəvidə bu mövqeyini qətiyyətlə müdafiə edir və getdikcə beynəlxalq aləmdə daha çox dəstək qazanır. Lakin buna baxmayaraq, dünyanın böyük güclərinin işğalçı Ermənistana daha çox yardım etməsi müşahidə olunur".
Müsahibimiz bildirib ki, Qarabağ 30 il ərzində tamamilə dağıdılıb, lakin bu gün onun bərpasına əsasən türk dövlətləri qoşulub: "Avropa və digər böyük dövlətlər bölgəyə gələrək “daşı-daş üstünə qoymayıblar. Ermənilərin viran qoyduğu yaşayış məntəqələri və tarixi abidələrimizin bərpasına yardım etmək istəməmələri açıq ədalətsizlikdir. Böyük dövlətlər humanizm, demokratiya və sivil dəyərlərdən danışsalar da, mina müharibəsinin nəticələrinə qarşı eyni həssaslığı nümayiş etdirmirlər. Bu, çox humanist bir işdir. Nə qədər insanlarımız mina partlayışları nəticəsində həyatını itirib. Belə bir vəziyyətdə Avropa İttifaqının və digər beynəlxalq qurumların dəstəyi sözlə deyil, əməli şəkildə olmalıdır".
Müsahibin qənaətinə görə, mina təmizlənməsi təkcə Azərbaycanın deyil, beynəlxalq ictimaiyyətin də üzərinə düşən məsuliyyətdir: “Bir dövlətin bu qədər geniş ərazidə minaları tam təmizləməsi çox çətindir. Kənar dövlətlərin də bu işə qoşulması həm humanitar, həm də mənəvi borcdur".
Mehriban İbrahimli
15:57 16.10.2025
Oxunuş sayı: 9045
