İndoneziya, Azərbaycan və Pakistan Qəzzada sabitləşdirmə qüvvələri göndərmək üçün əsas namizədlər hesab olunur
ABŞ Müdafiə Nazirliyinin hazırkı və sabiq rəsmilərinin verdiyi məlumata görə, İndoneziya, Azərbaycan və Pakistan Qəzza sektorunda gələcək sabitləşdirmə qüvvələrinin yerləşdirilməsi üçün əsas namizədlər kimi nəzərdən keçirilir. Mənbələr danışıqların həssas xarakter daşıması səbəbindən anonimlik şərti ilə danışıb.
Crossmedia.az “Politico” nəşrinə istinadən xəbər verir.
Hazırkı rəsmilərin sözlərinə görə, kontingentin tərkibi ilə bağlı danışıqlar davam edir və hələ heç bir ölkə qəti öhdəlik götürməyib. Rəsmilər bildiriblər ki, məhz bu ölkələr ən çox maraq göstəriblər. Trampın Qəzzada sülhə dair 20 bəndlik planı isə ərəb və digər tərəfdaşlarla birlikdə müvəqqəti qüvvələrin yerləşdirilməsini nəzərdə tutur. Bu qüvvələr sınaqdan keçmiş fələstinli polis bölmələrini hazırlayacaq və dəstəkləyəcək, eyni zamanda Misir və İordaniya ilə məsləhətləşmələr aparacaq. ABŞ isə öz hərbçilərinin Qəzzaya daxil olmayacağını bəyan edib.
Hətta hadisələr müsbət istiqamətdə inkişaf etsə belə, belə bir kontingentin yerləşdirilməsi bir neçə ay çəkəcək. Bir çox diplomat və analitiklər Tramp planının yalnız hazırkı mərhələ — yəni atəşkəs və İsraildə qalan bütün girovların azad olunması səviyyəsindən o tərəfə keçəcəyinə şübhə ilə yanaşır.
Bayden administrasiyası dövründə Pentaqonun Yaxın Şərq üzrə baş vəzifəsini icra etmiş Den Şapironun qiymətləndirməsinə görə, iştirakçı ölkələr barədə qərar qəbul edildikdən sonra təxminən iki-üç ay tələb olunacaq.
ABŞ artıq İsrailə 200 hərbçi göndərib. Onların məqsədi atəşkəsin qorunması və anklavda sabitliyin təmin edilməsində koordinasiyanı həyata keçirməkdir. Bu qüvvələr ABŞ Mərkəzi Komandanlığının tabeçiliyində olacaq və Qəzzanın şimalında, İsrail ərazisində yerləşən mülki-hərbi koordinasiya mərkəzində fəaliyyət göstərəcək. Burada misirli, qətərli və BƏƏ-lı hərbçilərin də iştirakı gözlənilir. Hazırda Misir bölmələri Qəzzada həlak olmuş girovların cəsədlərinin çıxarılması əməliyyatlarında iştirak edir.
Sabiq Müdafiə Nazirliyi nümayəndəsi əlavə edib ki, İndoneziya və Azərbaycanla koordinasiya prosesi çətinlik yaradır, çünki bu ölkələr ABŞ Mərkəzi Komandanlığının məsuliyyət zonasına daxil deyil.
Günel Verdiyeva
11:51 16.10.2025
Oxunuş sayı: 1782
