Emin Hüseynov: Ağdam azad edilmiş ərazilərin ən böyük şəhərinə çevriləcək
Azad edilmiş ərazilərdə bərpa prosesi vahid baş plan əsasında aparılır.
Crossmedia.az xəbər verir ki, bunu Xankəndidə keçirilən III Azərbaycan Milli Şəhərsalma Forumunda çıxış edən Prezidentin Ağdam, Füzuli və Xocavənd rayonları üzrə xüsusi nümayəndəsi Emin Hüseynov bildirib.
O deyib ki, azad edilmiş ərazilərdə bərpa və yenidənqurma işləri vahid baş plan konsepsiyası əsasında həyata keçirilir:
“Son beş ildə baş verən proseslərin şahidi olmaq, Qarabağda bərpa prosesinin bir parçası kimi çıxış etmək böyük qürurdur".
Emin Hüseynovun sözlərinə görə, Ağdam, Füzuli və Xocavənd rayonlarını əhatə edən 2,7 min kvadratkilometrlik ərazi 13,6 min kvadratkilometrlik azad edilmiş torpaqların ən fəal bərpa olunan hissəsidir.
O bildirib ki, bərpa prosesi beş mərhələdən ibarətdir – baş planlaşdırma, minalardan təmizləmə, infrastrukturun yaradılması, sosial-iqtisadi obyektlərin qurulması və Böyük Qayıdış:
“Bütün addımlar paralel şəkildə aparılır. Əsas prinsip ərazi bərabərliyidir – bütün regionlarda eyni konsepsiya tətbiq olunur".
Xüsusi nümayəndə qeyd edib ki, Ağdam azad edilmiş ərazilərin ən böyük, Azərbaycanın isə dördüncü böyük şəhərinə çevriləcək. Burada 100 min nəfər, Füzulidə isə 50 min nəfər əhalinin yaşayacağı planlaşdırılır:
“Hər iki şəhərin baş planı beynəlxalq ekspertlərin iştirakı ilə hazırlanıb və 2040-cı ilə qədər dövrü əhatə edir".
11:01 16.10.2025
Oxunuş sayı: 8618
