Daxilimizdə olan düşmənlər dövlətimizin fəaliyyətinə kölgə salmaq istəyir – Açıqlama
Prezident Administrasiyasının sabiq rəhbəri, akademik Ramiz Mehdiyev barəsində 4 aylıq ev dustaqlığı tədbiri seçilib. Onun barəsində başlanmış cinayət işi çərçivəsində məhkəmənin qərarı ilə ev dustaqlığı tədbiri tətbiq olunub.
Ramiz Mehdiyevin cinayət məsuliyyətinə cəlb edilməsi ilə bağlı politoloq Azad Məsiyev Crossmedia.az-a danışıb.
Politoloq bildirib ki, hər bir kəs kimliyindən asılı olmayaraq öz əməlinə görə qanun qarşısında cavab verməlidir: ‘’Ramiz Mehdiyev barəsində irəli sürülən ittihamlar çox ağır ittihamlardır. Dövlətin müvafiq qurumlarında bu ittihamları təsdiq edəcək faktlar olmasaydı, bu cürə ittihamlar irəli sürülməzdi. Ramiz Mehdiyev təsadüfi, sadə bir insan deyil. Onun kifayət qədər maliyyə imkanları var və o, dövlətin müvafiq qurumlarına əli uzana bilən şəxsdir. Həmçinin siyasi hakimiyyətdə olan zamanda kifayət qədər güc formalaşdırmış bir şəxs olub. İrəli sürülən ittihamlar da onu təsdiqləyir ki, Ramiz Mehdiyev hakimiyyətdən getdikdən sonrada dinc oturmayıb. O, gizli də olsa fəaliyyət göstərib. Xatırladım ki, 2019-cu ildə Azərbaycanda parlament buraxıldı və növbədənkənar parlament seçkiləri keçirildi. Bu ona hesablanan addım idi ki, Ramiz Mehdiyev hakimiyyətdə olduğu dövrdədə dövlətin bütün qurumlarına -istər parlament, istər güc strukturları, istərsə də iqtisadi sferalar olsun öz kadrlarını yerləşdirən bir şəxs olmuşdur’’.
Azad Məsiyev parlamentin 2019-da buraxılmasının Ramiz Mehdiyevin kadrlarının müvafiq qurumlardan təmizlənməli olduğu üçün edildiyini deyib: “Yəni, görünür Ramiz Mehdiyev barəsində kifayət qədər faktlar var idi ki, uzun müddət onun fəaliyyəti nəzarət altında olub. Bayaq da dediyim kimi parlamentin buraxılması da təsadüfi deyildi, hakimiyyəti ələ keçirmək üçün mütləq şəkildə patlamentdə güc sahibi olmalı idi. Deməli, parlamentin buraxılması da onu göstərir ki, Ramiz Mehdiyev o dövrdən dinc oturmayıb və hakimiyyəti ələ keçirmək üçün bir planı olub. Zaman-zaman da onun kadrları müvafiq qurumlardan təmizlənib. Bu ittihamlar barəsində dövlətin müvafiq qurumlarında kifayət qədər faktlar olmasaydı, Ramiz Mehdiyevə qarşı belə bir ittiham irəli sürülməzdi. Hesab edirəm ki, hər bir kəs öz əməlinə görə cavab verməlidir. Aparılan istintaq işləri də, onun haqqında irəli sürülən ittihamları da təsdiq edəcək faktlar üzə çıxacaq. Məhkəmə prosesinə gəldikdə isə, məhkəmə açıq keçirilməlidir ki, ictimaiyyət də onun fəaliyyətindən xəbərdar olsun. Təəsüflər olsun ki, bu cür insanlar müxtəlif dövrlərdə dövlətin müvafiq qurumlarında, dövlətin imkanlarından bəhrələnərək, özlərinin sosial vəziyyətini yaxşılaşdırdıqdan sonra bu cürə nankorluq edərək dövlətə xəyanət, dövləti mənimsəmək kimi dövlət çevrilişinə cəhdlər edirlər. Hesab edirəm ki, istintaq prosesində onun əməlləri və ona yaxın olan bu proseslərdə iştirak edən şəxslər də aşkarlanacaq. Dövləti ələ keçirmək bir şəxsin iradəsinə bağlı deyil. Bu hansısa bir komanda ilə fəaliyyət göstərilən bir işdir. Yəni bir şəxs təkbaşına hakimiyyəti ələ keçirə bilməz. Bu adamın niyyəti hakimiyyəti ələ keçirməkdirsə deməli, həm siyasi müstəvidə, həm iqtisadi müstəvidə, həm də güc strukturunda ona dəstək verəcək, onunla həmfikir olacaq şəxslərin də olduğu ehtimal edilməlidir. Çünki bir şəxsin təkbaşına hakimiyyəti ələ keçirə bilmə şansı qeyri-mümkündür. Ona görə hesab edirəm ki, istintaq işləri bu məsələni dəqiqləşdirəcək. Təbii ki, bu işdə əli olan şəxslər aşkarlanmalıdır ki, dövlətə gələcəkdə problem yaranmasın. Ümumillikdə Azərbaycan Prezidentinin apardığı siyasətə kölgə salmaq və onun uğurlu addımlarına şübhə etmək nankorluqdur. Bildiyiniz kimi, işğal olunmuş torpaqların azad edilməsində Azərbaycan Prezidentinin rəhbərliyi altında əməliyyət həyata keçirildi. Azərbaycanın həm regional baxımdan, həm də qlobal müstəvidə siyasi dövlət kimi mövqeyi Prezident İlham Əliyevin səyi nəticəsində təsdiqlənir və etiraf olunur. Böyük güclər Prezidentin fəaliyyətinə xüsusi diqqət yetirərək, onun şəxsinə xoş sözlər ifadə edir. Amma daxilimizdə olan düşmənlər təbii ki, Prezidentin fəaliyyətinə kölgə salmaq istəyəcək. Belə şəxslər isə vaxtında aşkar edilib fəaliyyətlərinə qiymət verilməlidir. Bir daha təkrar edirəm ki, Ramiz Mehdiyev barəsində irəli sürülən ittihamlar çox ağır ittihamlardır və dövlətin müvafiq qurumlarında faktlar olmasaydı ona bu cürə ittihamlar irəli sürülməzdi. Hesab edirəm ki, dövlət və dövlətin müvafiq qurumları öz vəzifə və səlahiyyətlərini vaxtında yerinə yetirəcək’’.
Zeynəb Xuduyeva
19:42 15.10.2025
Oxunuş sayı: 22308
