Ramiz Mehdiyev həm dövlət, həm də milli maraqlar əleyhinə fəaliyyət göstərib - Açıqlama
Prezident Administrasiyasının sabiq rəhbəri Ramiz Mehdiyevin dövlətə xəyanət ittihamı ilə həbs olunması Azərbaycan ictimaiyyəti üçün ciddi xəbər oldu. Bu hadisə bir daha göstərdi ki, ölkədə vəzifə və səlahiyyətlərindən asılı olmayaraq, heç kim dövlət maraqlarına qarşı hərəkət edə bilməz və hüquqi məsuliyyətdən kənarda qala bilməz.
Mövzu ilə bağlı AMEA Fəlsəfə və Sosiologiya İnstitutunun şöbə müdiri, fəlsəfə doktoru, dosent Məhəmməd Cəbrayılov Crossmedia.az-a açıqlama verib: “Ramiz Mehdiyevin fəaliyyəti və cinayətkar əməlləri barədə mətbuatda dəfələrlə müzakirələr aparılıb, onun haqqında yazılar getmişdi. Amma bu dəfəki əməllərini ifşa edən konkret cinayət maddəsi qaldırılıb və faktlar açıq şəkildə ortaya qoyulub. Ramiz Mehdiyev həm dövlət əleyhinə, həm də milli maraqlar əleyhinə fəaliyyət göstərib. O, illərlə hakimiyyət daxilində marjinal qrup formalaşdırıb, daha sonra isə bu qrupla dövlət və milli maraqlar əleyhinə hərəkət edib".
Alim qeyd edib ki, bu, Azərbaycan ictimaiyyəti və siyasətçiləri üçün əvvəldən məlum olan bir həqiqət idi: “Görünürdü ki, nə vaxtsa onun fəaliyyəti hüquqi qiymət almalı idi. İndi isə konkret maddələr üzrə təsbit olunan sübutlar əsasında onun cinayətkar fəaliyyəti qiymətləndirilir".
Məhəmməd Cəbrayılov vurğulayıb ki, Ramiz Mehdiyev yaşına baxmayaraq, vəzifədən çıxarıldıqdan sonra AMEA-da fəaliyyətini davam etdirib və bu müddətdə akademiyanın nüfuzuna ciddi zərbə vurub: “Akademiyanın ictimai nüfuzunun aşağı salınmasında böyük rolu olub. Bu gün də onun Elmlər Akademiyasından uzaqlaşdırılmasına baxmayaraq, Akademiyanın cəmiyyətdəki nüfuzunu bərpa etmək hələ mümkün olmayıb".
O əlavə edib ki, Ramiz Mehdiyevin əməlləri yalnız “sıradan” cinayət maddələri deyil: “Bu, dövlət hakimiyyətini ələ keçirmə, dövlətə xəyanət və cinayət yolu ilə əmlakın leqallaşdırılması kimi ağır maddələrdir. Hər qaldırılan maddə göstərir ki, o, hakimiyyətdə olduğu dövrdə resurslardan istifadə edərək cinayətkar əməllərlə məşğul olub".
Dosent qeyd edib ki, Ramiz Mehdiyev 5-ci kalonun fəaliyyətini dəstəkləmək üçün əlindən gələni edib: “Ölkə Prezidentinin vaxtında müdaxiləsi müəyyən proseslərin qarşısını qismən aldı, amma görünür ki, cəzalandırılmaq üçün vaxtı çatmalı idi. İndi isə haqq öz sözünü deyəcək və o, layiqli cəzasını alacaq".
Məhəmməd Cəbrayılov əlavə edib ki, Ramiz Mehdiyevin ifşası yalnız onunla bitməyəcək: “Bu xəttə bağlı bir çox şəxslərin də ifşası qaçılmazdır. Vaxtilə onun ətrafında olanlar, gücündən bəhrələnənlər artıq mətbuatda açıqlamalar verir. Amma Azərbaycan ictimaiyyəti bilir ki, kim kimdir. Yaxın gələcəkdə digər iştirakçıların da hüquqi məsuliyyətə cəlb olunması gözlənilir".
Mehriban Yariyeva
18:52 15.10.2025
Oxunuş sayı: 22811
