Azərbaycan son 22 ildə əhəmiyyətli iqtisadi inkişaf yolu keçib - Deputat
2003-cü ildə xalqın etimadını qazanaraq Azərbaycan Respublikasının Prezidenti seçilən İlham Əliyev ölkəmizin siyasi və iqtisadi inkişafında yeni mərhələnin başlanğıcını qoydu. 15 oktyabr 2025-ci il ölkəmiz üçün həm siyasi hadisə, həm də Azərbaycanın müstəqillik dövründə sabitlik və inkişaf yolunda əldə etdiyi uğurların simvolu kimi dəyərləndirilir.
Onun rəhbərliyi ilə Azərbaycan güclü dövlətçilik prinsiplərinə əsaslanan, beynəlxalq arenada nüfuz sahibi olan və regional layihələrdə fəal iştirak edən bir ölkəyə çevrildi. Ölkəmiz artıq dünya miqyasında etibarlı tərəfdaş kimi tanınır və strateji əhəmiyyətli layihələrdə iştirakını davam etdirir.
Məsələ ilə bağlı Crossmedia.az-a danışan Milli Məclisin deputatı Razi Nurullayev bildirib ki, son 22 ildə Azərbaycan əhəmiyyətli iqtisadi inkişaf yolu keçib. Ölkənin iqtisadi potensialı artıb, sosial rifah yaxşılaşıb, regionlarda infrastruktur yenilənib və Qarabağda bərpa işləri uğurla aparılıb. Bu inkişaf yalnız iqtisadi göstəricilərdə deyil, həm də insanların həyat səviyyəsinin yüksəlməsində aydın hiss olunur.
Deputat vurğulayıb ki, bu inkişafın davamlılığını təmin etmək üçün əlavə islahatlar vacibdir. İlk növbədə, kənd təsərrüfatının modernləşdirilməsi və yeni texnologiyaların tətbiqi böyük önəm daşıyır. Təhsil və insan kapitalının inkişafı da dayanıqlı iqtisadiyyat üçün əsas şərtlərdəndir, çünki bilik və bacarıq artıq iqtisadiyyatın dayaqlarından biridir.
Razi Nurullayev həmçinin qeyd edib ki, kiçik və orta sahibkarlığın dəstəklənməsi, sahibkarlıq mühitinin sadələşdirilməsi və kredit mexanizmlərinin çevikləşdirilməsi qeyri-neft sektorunun inkişafına imkan yaradacaq. Rəqəmsal iqtisadiyyatın və süni intellekt texnologiyalarının tətbiqi həm dövlət idarəçiliyində, həm də iqtisadiyyatın müxtəlif sahələrində səmərəliliyi artıracaq.
Deputat əlavə edib: “Bölgələr arasında sosial bərabərliyin və xidmətlərə çıxış imkanlarının təmin olunması cəmiyyətin stabilliyini qorumaq baxımından böyük əhəmiyyət kəsb edir. Bu istiqamətdə atılacaq addımlar Azərbaycanın iqtisadi və sosial inkişafını davamlı edəcək, qeyri-neft sektorunu gücləndirəcək və xalqın rifahını daha da yüksəldəcək".
Mehriban Yariyeva
17:47 15.10.2025
Oxunuş sayı: 8319
