Prezident İlham Əliyevin 22 illik fəaliyyəti 200 illik qələbə tarixinə bərabərdir - Deputat
15 oktyabr 2025-ci il — Azərbaycan tarixində mühüm bir gün kimi qeyd olunur. Bu gün cənab İlham Əliyevin Azərbaycan Respublikasının Prezidenti seçilməsinin 22-ci ildönümüdür.
2003-cü ildə xalqın böyük etimadını qazanaraq Prezident seçilən İlham Əliyev, müasir Azərbaycanın inkişafında yeni bir mərhələnin əsasını qoydu. Ulu Öndər Heydər Əliyevin siyasi kursunun layiqli davamçısı kimi o, son 22 il ərzində dövlətçiliyin möhkəmlənməsi, iqtisadiyyatın yüksəlişi, ordunun gücləndirilməsi və xalqın rifah halının yaxşılaşdırılması istiqamətində mühüm nailiyyətlər əldə edib.
Prezident İlham Əliyevin rəhbərliyi ilə Azərbaycanın ərazi bütövlüyü bərpa olunub, ölkə beynəlxalq aləmdə güclü və söz sahibi bir dövlətə çevrilib. Bu gün Azərbaycan regionun siyasi, iqtisadi və humanitar mərkəzlərindən biri kimi sürətlə inkişaf edir və Ulu Öndər Heydər Əliyevin arzularını gerçəyə çevirir.
Mövzu barədə Crossmedia.az-a danışan Milli Məclisin deputatı Hikmət Babaoğlu bildirib ki, 15 oktyabr 2003-cü ildə cənab İlham Əliyevin Azərbaycan Prezidenti seçilməsi, Azərbaycan dövlətçilik tarixində tamamilə yeni bir mərhələnin başlanğıcı oldu.
Deputatın sözlərinə görə, bu mərhələ Ulu Öndər Heydər Əliyevin əsasını qoyduğu ideyaların, məqsəd və vəzifələrin yeni beynəlxalq çağırışlar əsasında yenidən formalaşması ilə xarakterizə olunur: “Əgər çox qısaca müqayisə aparsaq, Prezident İlham Əliyevin Azərbaycan siyasətində və dövlətçilik tarixində oynadığı rolu iki mərhələyə bölmək olar. Birinci mərhələ – 2020-ci ildəki 44 günlük Vətən müharibəsi ilə tamamlandı. Faktiki olaraq, Prezident İlham Əliyev hakimiyyətinin ilk 17 ilində əcdadlarımızdan miras qalmış 200 illik problemi cəmi 44 günə həll etdi. Bu, həm siyasət, həm də hərb tarixində misli görünməmiş hadisə idi".
Deputat qeyd edib ki, sonrakı dövr isə bu hərbi qələbənin siyasi və diplomatik müstəvidə tamamlanması mərhələsidir: “2025-ci ilin 8 avqustunda ABŞ-da bu prosesin siyasi yekunlaşması ilə Azərbaycan tarixi qələbəsini tam şəkildə təsdiqlədi. Beləliklə, Prezident İlham Əliyevin 22 illik prezidentlik dövrü 200 ilə bərabər bir qələbə tarixidir".
Hikmət Babaoğlu vurğulayıb ki, dövlətin fəaliyyəti çoxşaxəlidir və yalnız hərbi-siyasi sahə ilə məhdudlaşmır: “Ölkəmizə rifahın gəlməsi, vətəndaşlarımızın təhlükəsizliyinin təmin olunması, beynəlxalq münasibətlər sistemində Azərbaycanın rolunun artması — bütün bunlar Prezident İlham Əliyevin 22 illik fəaliyyətinin əsas göstəriciləridir. Bu, dövlətçilik tariximizin tamamilə yeni bir səhifəsidir".
Mehriban Yariyeva
17:03 15.10.2025
Oxunuş sayı: 17613
