Ramiz Mehdiyevin əməli araşdırılacaq, ortaya qoyulacaq və lazım olan cəzanı da alacaq - Deputat
Prezident Administrasiyasının sabiq rəhbəri Ramiz Mehdiyev barəsində məhkəmə qərarı ilə 4 ay müddətinə ev dustaqlığı qətimkan tədbiri seçilib. Ramiz Mehdiyev Xüsusilə ağır cinayət əməllərinə görə cinayət məsuliyyətinə cəlb olunub. Ramiz Mehdiyevin ittiham edildiyi maddələr açıqlanıb. O, Cinayət Məcəlləsinin 278.1 (dövlət hakimiyyətini ələ keçirməyə yönələn əməllər), 274 (dövlətə xəyanət) və 193-1.3.2-ci (cinayət yolu ilə əldə edilmiş əmlakı leqallaşdırma) maddələri ilə ittiham olunur.
Ramiz Mehdiyevin xüsusilə ağır cinayət törətməkdə ittiham olunmasını nəzərə alaraq, onun fəxri adlardan və dövlət təltiflərindən məhrum edilməsinin zəruriliyi məhkəmə tərəfindən müəyyən edilə bilər.
Ramiz Mehdiyevin məsuliyyətə cəlb edilməsi ilə bağlı deputat Aqil Abbas Crossmedia.az-a açıqlama verib: “İstintaq araşdıracaq, cəzasını məhkəmə verəcək. Od olmayan yerdən tüstü çıxmaz. Yanlışı olub, araşdırıblar və üzə çıxarıblar. Araşdırılacaq, ortaya qoyulacaq və lazım olan cəzanı da alacaq’’.
Deputat bildirib ki, verilən maddələrə görə Ramiz Mehdiyevin ağır cəzalandırılması gözlənilir: “Bütün titullarından məhrum olma məsələsi də var. O artıq cənab Prezidentin səlahiyyətində olan məsələdir. YAP-ın adına ləkə gətirən şəxsin yəqin ki, YAP-dan çıxarılması da qaçılmazdır. Partiyaya ləkə gətiribsə çıxarılması mütləqdir’’.
16:36 15.10.2025
Oxunuş sayı: 15673
