BMT rəsmisi: Azərbaycanın şəhərsalma təşəbbüsləri müsbət nümunə hesab olunur
Azərbaycanın şəhərsalma və iqlim davamlılığı təşəbbüsləri qlobal səviyyədə müsbət nümunə kimi qəbul olunur.
Crossmedia.az xəbər verir ki, bunu BMT-nin İnsan Məskənləri Proqramının (UN-Habitat) icraçı direktoru Anaklaudiya Rossbax Xankəndində keçirilən “ III Azərbaycan Şəhərsalma Forumunda” (AZERBAIJANUF) çıxışı zamanı bildirib.
O bildirib ki, keçirilən Forum 2026-cı ildə keçiriləcək 13-cü Dünya Şəhər Forumu (WUF13) ilə qlobal şəhər siyasətində dönüş nöqtəsinə çevriləcək.
Rossbax qeyd edib ki, Forum COP30-un nəticələrinin formalaşmasına və “Yeni Şəhər Gündəliyi”nin icrasının yarısına təsadüf edən WUF13-ə mühüm töhfə verir. Onun sözlərinə görə, 2026-cı ildə həmçinin Dayanıqlı İnkişaf Məqsədləri üzrə 11-ci məqsədin (“Davamlı şəhərlər və icmalar”) Qlobal İcmalı da təqdim olunacaq.
BMT rəsmisi əlavə edib ki, WUF13-ün mövzusu “Evi olan dünya: təhlükəsizlik və bərabərlik” olacaq və bu, mənzil və şəhər bərabərliyi məsələlərinə diqqəti artıracaq.
“Bakıda keçiriləcək WUF13 qlobal tərəfdaşlıqların və iqlimə davamlı şəhər inkişafı üzrə öhdəliklərin yenilənməsi üçün əsas platforma olacaq,” – Rossbax vurğulayıb.
11:57 15.10.2025
Oxunuş sayı: 8064
