Azərbaycanın Şarm əş-Şeyxdəki Sülh Sammitində iştirakı ölkəmizin artan qlobal nüfuzunun göstəricisidir- Deputat
Prezident İlham Əliyevin Misirin Şarm əş-Şeyx şəhərində keçirilən Yaxın Şərq Sülh Sammitində iştirakı Azərbaycanın beynəlxalq arenadakı artan nüfuzunun və regional liderliyinin bariz göstəricisidir. Bu hadisə ölkəmizin yalnız Cənubi Qafqazda deyil, həm də Yaxın Şərq kimi mürəkkəb geosiyasi məkanda sülh və sabitliyin təşviqində fəal rol oynadığını bir daha nümayiş etdirib. Prezidentin köməkçisi Hikmət Hacıyev qeyd edib ki, Azərbaycan bu gün Yaxın Şərqdə sülh gündəliyində bütün tərəflər üçün etibarlı və arzuolunan tərəfdaşa çevrilib.
Bu barədə Crossmedia.az-a danışan Milli Məclisin deputatı Naqif Həmzəyev bildirib ki, Prezident İlham Əliyevin Şarm əş-Şeyxdə keçirilən Sülh Sammitində iştirakı Azərbaycanın artan beynəlxalq nüfuzundan xəbər verir.
Deputat vurğulayıb ki, sammitdə iştirak edən bütün tərəflər Azərbaycanın bu prosesdə yer almasını arzulayır və dəstəkləyirdi: “Bu, çox az sayda liderə nəsib olan bir uğurdur. Ancaq Azərbaycan və Prezident İlham Əliyev bunu bacardı. Sammitin gedişində, ikitərəfli təmaslar zamanı və liderlərin səmimi söhbətləri əsnasında Prezidentə olan böyük marağı aydın şəkildə gördük. Prezidenti Donald Trampın dəfələrlə İlham Əliyevə müraciət etməsi, onu nümunə göstərməsi və sammit zamanı sərgilədiyi münasibət Azərbaycanın beynəlxalq səviyyədə müstəqil siyasət yürütməsinin bariz göstəricisidir. Azərbaycan həm müsəlman ölkələri, həm də İsrail və ona yaxın dövlətlər tərəfindən qəbul olunur, dəstəklənir və regional, həmçinin qlobal güc kimi rolunun artdığını sübut edir. Azərbaycan hər kəslə yaxın olduğu qədər, eyni zamanda bərabər məsafədə dayanmağı bacarır. Bir sözlə, ölkəmiz müstəqil siyasət yürüdür".
Deputat əlavə edib ki, sammitdə əldə edilən razılaşmalar mühüm addım olsa da, hələ qarşıda çətin mərhələlər var. Onun sözlərinə görə, Türkiyə–İsrail münasibətlərinin tam bərpası istiqamətində Azərbaycan mühüm vasitəçi rolunu oynaya bilər:
“Azərbaycan artıq bir dəfə bu münasibətlərin normallaşmasına töhfə verib və biz inanırıq ki, ikinci dəfə də bunu bacaracaq. Yeri gəlmişkən, Azərbaycan İsrail və Suriya rəsmiləri arasında görüşlərin təşkili ilə də regionda gərginliyin azalmasına töhfə verib. Bununla yanaşı, Qəzza bölgəsində humanitar dəstək və bərpa işləri sahəsində də Azərbaycanın təcrübəsindən istifadə oluna bilər. Azərbaycan Qarabağ və Şərqi Zəngəzurda həyatın bərpasını təmin edib. Bu, yeni dövrdə ən real və praktik həll modelidir. Bu təcrübə Yaxın Şərqdə də tətbiq oluna bilər".
Sonda deputat qeyd edib ki, Şarm əş-Şeyxdə keçirilən sammitdə Azərbaycanın fəal iştirakı və əldə etdiyi nailiyyətlər ölkəmizin düzgün istiqamətdə irəlilədiyini sübut edir.
Mehriban Yariyeva
21:53 14.10.2025
Oxunuş sayı: 8428
