Azərbaycan, Türkiyə və Pakistan arasında münasibətlər yüksək səviyyədədir - Deputat
Pakistan Prezidenti Asif Əli Zərdari bildirib ki, Pakistan Türkiyə və Azərbaycanla qurulan yaxın əlaqələrə və dostluq münasibətlərinə böyük önəm verir. Onun sözlərinə görə, bu münasibətlərin əsasını ortaq inam, qarşılıqlı güvən və regional rifah arzusu təşkil edir.
Prezident Asif Əli Zərdari bu fikirləri İslamabadda Azərbaycan Milli Məclisinin sədri Sahibə Qafarova və Türkiyə Böyük Millət Məclisinin sədri Numan Kurtulmuşu qəbul edərkən səsləndirib. Görüş zamanı üç qardaş ölkə arasında siyasi, iqtisadi və parlamentlərarası əməkdaşlığın möhkəmləndirilməsi, regionda sülhün və sabitliyin bərqərar olunması istiqamətində fikir mübadiləsi aparılıb.
Bakı, Ankara və İslamabad arasında üçtərəfli əməkdaşlığın inkişafı barədə Milli Məclisin deputatı Vüqar İsgəndərov Crossmedia.az-a danışıb: "Azərbaycan Milli Məclisinin sədri, hörmətli Sahibə Qafarova İstanbulda keçirilən Azərbaycan, Pakistan və Türkiyə parlament sədrlərinin birgə görüşündə iştirak edib. Görüş zamanı bir sıra mühüm qərarlar qəbul olunub, əməkdaşlığın dərinləşdirilməsinə dair sənədlər imzalanıb. Əsas müzakirə istiqamətlərindən biri regionda sülhün, sabitliyin və rifahın təmin edilməsi, bu məqsədlə parlamentlərarası əməkdaşlığın daha da genişləndirilməsi olub. İstanbul görüşü çərçivəsində spikerlər Pakistan Prezidenti Asif Əli Zərdari tərəfindən də qəbul olunublar. Qəbul zamanı Pakistan Prezidenti üç qardaş ölkə Azərbaycan, Türkiyə və Pakistan arasında həm dövlət, həm də parlament səviyyəsində formalaşan səmimi dostluq münasibətlərini yüksək qiymətləndirib. O, qəbul edilən qərarların hər üç ölkənin gələcək fəaliyyət istiqamətlərində qarşılıqlı anlaşma, bərabər hüquqlu tərəfdaşlıq və regional rifah baxımından mühüm əhəmiyyət kəsb etdiyini vurğulayıb.
Azərbaycan, Türkiyə və Pakistan arasında qurulmuş dostluq və strateji əməkdaşlıq münasibətləri bu gün də uğurla inkişaf etdirilir. Pakistan hər iki ölkə ilə sıx və qarşılıqlı faydalı əməkdaşlıq nümayiş etdirir. Həm Azərbaycan, həm də Türkiyə ilə ortaq mövqelərin olması üçtərəfli əlaqələrin gələcəkdə daha da möhkəmlənəcəyinə inam yaradır. Bu əməkdaşlığın əsasını qarşılıqlı etimad, sarsılmaz qardaşlıq telləri və regional rifaha yönəlmiş ortaq niyyət təşkil edir. Bu fikir Pakistan Prezidentinin çıxışında da öz əksini tapıb”.
Parlamentari əlavə edib ki, üç qardaş ölkə həm çətin günlərdə, həm də uğurlu anlarda bir-birinin yanında olub: “Dövlət başçıları və hökumət rəhbərləri mütəmadi görüşlər keçirir, mühüm sənədlər imzalayır, əməkdaşlığın müxtəlif sahələrdə inkişafı üçün addımlar atırlar. Həm mədəni, həm iqtisadi, həm də hərbi və hərbi-texniki sahələrdə əməkdaşlığın yeni səviyyəyə qaldırılması istiqamətində həm hökumətlər, həm də parlamentlər səviyyəsində mühüm təşəbbüslər həyata keçirilir. Azərbaycan Milli Məclisinin sədri Sahibə Qafarovanın İstanbulda keçirdiyi görüşlər zamanı da bu məsələlər geniş müzakirə olunub, əməkdaşlığa dair əhəmiyyətli sənədlər imzalanıb. Parlamentlərarası münasibətlər beynəlxalq əlaqələr sistemində xüsusi yer tutur və parlament diplomatiyası ölkələrin xarici siyasətinin mühüm tərkib hissəsidir".
Deputat, həmçinin Azərbaycan Milli Məclisinin bu sahədə artıq beynəlxalq səviyyədə nüfuz qazandığını qeyd edib: "Parlamentin sədri, xanım Sahibə Qafarova ölkəmizi xarici səfərlərdə yüksək səviyyədə təmsil edir, qəbul olunan qərarların həyata keçirilməsində və Prezident İlham Əliyevin müəyyən etdiyi siyasi xəttin parlament səviyyəsində də təbliğində mühüm rol oynayır. İstanbulda keçirilən üç qardaş ölkə parlament sədrlərinin görüşündə qəbul edilən qərarlar da bu əməkdaşlığın dərinləşməsinə, regional sabitliyin və rifahın möhkəmlənməsinə öz töhfəsini verəcəkdir".
Elmir Heydərli
21:27 14.10.2025
Oxunuş sayı: 1985
