Təxribatlar davam edərsə bu, Ermənistan dövlətçiliyi üçün çox böyük təhlükə demək olacaq - Deputat
Ermənistanın dini və siyasi tarixi göstərir ki, bu ölkədə kilsə təkcə dini institut kimi deyil, həm də ideoloji və siyasi alət kimi fəaliyyət göstərib. Xüsusilə son 150 ildə erməni kilsəsi öz dini missiyasını kənara qoyaraq, faşist və təxribatçı ideologiyanın daşıyıcısına çevrilib. Bu qurum zaman-zaman terror təşkilatlarına mənəvi dəstək verməklə, bölgədə sabitliyi pozan əsas amillərdən biri kimi çıxış edib. Bu gün də kilsənin revanşist qüvvələrlə birləşməsi, sülh prosesinə qarşı çıxması və erməni cəmiyyətini yeni qarşıdurmalara sürükləməsi bu siyasətin davam etdiyini göstərir. Belə bir vəziyyətdə Ermənistan rəhbərliyinin məsuliyyətli, prinsipial mövqe nümayiş etdirməsi regionun gələcəyi baxımından həlledici əhəmiyyət daşıyır.
Mövzu ilə bağlı Milli Məclisin deputatı Nəsib Məhəməliyev Crossmedia.az-a açıqlama verib: "Erməni kilsəsinin, ümumiyyətlə, son 150 ildə apardığı ideologiya və təxribat Türk dünyasına qarşı ideologiyanın tərkib hissəsidir. Bu barədə düzgün qeyd edilir ki, erməni kilsəsi Daşnaksütyun Millətçi Partiyasının və eyni zamanda ASALA kimi digər erməni terror təşkilatlarının mənəvi qida verən bir mərkəzidir. Zəhər saçan, xüsusi sübuta ehtiyacı olmayan bir təşkilatdır. Çünki hələ 100 il bundan əvvəl, Rusiya imperiyası dövründə İmperator II Nikolayın xüsusi sərəncamı ilə kilsənin apardığı təxribatlar, kilsədə silahlı qüvvələrin yetişdirilməsi, xüsusi silahların və bandit dəstələrinin saxlanılması, silahların qorunub saxlanılması ilə bağlı çoxsaylı məlumatlar mövcud idi. Buna görə də çar xüsusi sərəncamla erməni kilsəsinin əmlakının müsadirə olunması barədə qərar vermişdi".
Deputat qeyd edib ki, 44 günlük müharibədən sonra erməni kilsəsinin başçısı I Qaregin və onun tabeliyində olan bütün kilsə xadimləri məğlubiyyətlə barışmaq istəmədilər və revanşizm hissi ilə cəmiyyəti revanşa səslədilər, təxribat ruhunda köklədilər: "Bu təxribatçı siyasət indi də davam edir. Buna görə də Paşinyan burada ciddi, prinsipial mövqe sərgiləməlidir. Düzdür, son zamanlar Paşinyan erməni kilsəsinin iç üzünü tam ifşa etdi, erməni xalqının ən ciddi problemi kimi kilsəni göstərdi və kilsə dindarlarına, erməni cəmiyyətinə müraciət edərək bildirdi ki, Qaregin erməni katolikosu vəzifəsindən
kənarlaşdırılmalıdır".
N. Məhəməliyev son olaraq bildirib: "Bu gün biz görürük ki, keçmiş “kriminal Qarabağ klanı” – Robert Koçaryan, Serj Sarkisyan, Levon Ter-Petrosyan, yəni Ermənistanın əvvəlki prezidentləri kilsənin ətrafında birləşirlər: Bu yaxınlarda da həmin dindarlardan biri, kilsə nümayəndəsi Baqrat, çalışdı ki, Paşinyanı güc yolu ilə hakimiyyətdən devirsin, yenidən müharibə başlatsın və eyni zamanda delimitasiya-demarkasiya komissiyasının əldə etdiyi razılaşmaları tanımasın. Bu isə, hesab edirəm ki, çox ağılsız bir siyasətdir. Çünki 8 avqustda Prezident İlham Əliyevin, Baş nazir Nikol Paşinyanla birlikdə ABŞ Prezidenti Donald Trampın vasitəçiliyi ilə əldə etdiyi sülh razılaşması — daha doğrusu, sülh müqaviləsinin paraflanması — Ermənistan üçün də kifayət qədər mühüm nəticələr doğurur. Əgər bəzi xarici qüvvələrin, o cümlədən regionda gərginliyi saxlamaqda maraqlı olan böyük güclərin, lobbi təşkilatlarının və Azərbaycanın qələbəsi ilə hesablaşmayan erməni diaspor təşkilatlarının təxribatları davam edərsə, bu, Ermənistan dövlətçiliyi üçün çox böyük təhlükə deməkdir. Əgər onlar yenidən müharibə və separatçılıq meyillərini davam etdirəcəklərsə, təbii ki, Azərbaycan Ordusu dəmir yumruq ətrafında birləşəcək, xalqla birlikdə öz sözünü deyəcək. Burada heç bir şübhə ola bilməz. Ancaq yaxşı olardı ki, başlanılmış sülh addımları məntiqi sonluqla başa çatsın və nəhayət, Cənubi Qafqaz regionuna əmin-amanlıq və davamlı sülh gəlsin".
Ayhan
18:55 14.10.2025
Oxunuş sayı: 2409
