Azərbaycan ilə Rusiya arasında iqtisadi artım tempi bütövlükdə qorunub saxlanılıb - Deputat
Son dövrlər Azərbaycan-Rusiya münasibətləri regional və beynəlxalq müstəvidə mühüm müzakirə mövzularından birinə çevrilib. İkitərəfli əlaqələrin müəyyən mərhələlərində siyasi və diplomatik soyuqluqlar müşahidə olunsa da, tərəflər arasında qarşılıqlı maraqlar, xüsusilə də iqtisadi və ticarət əməkdaşlığı sahəsində əlaqələr davam etdirilib. Bu, iki ölkə arasında strateji tərəfdaşlığın dərin köklərə malik olduğunu və münasibətlərin tam dayanmadığını bir daha təsdiqləyir.
Məhz bu kontekstdə Rusiya Prezidentinin mətbuat katibi Dmitri Peskovun son açıqlaması diqqət çəkib. O, “Moskva. Kreml. Putin” verilişinə müsahibəsində qeyd edib ki, baxmayaraq ki, bu dövr ikitərəfli münasibətlərin tarixində ən gərgin mərhələlərdən biri sayılır, ticari-iqtisadi əməkdaşlığın həcmi artmaqda davam edib. Bu isə onu göstərir ki, Rusiya və Azərbaycan arasında təmaslar tam şəkildə kəsilməyib, əksinə, dialoqun davamı üçün siyasi və iqtisadi zəmin qorunub saxlanılıb.
Məsələ ilə bağlı Milli Məclisin deputatı Vüqar Bayramov Crossmedia.az-a fikirlərini bildirib:
"Azərbaycan ilə Rusiya arasında iqtisadi artım tempi bütövlükdə qorunub saxlanılıb. Münasibətlərdə müəyyən soyuqluq müşahidə olunsa da, bu, iqtisadi və ticarət əlaqələrinin inkişafına ciddi təsir göstərməyib. 2024-cü ildə iki ölkə arasında ticarət dövriyyəsi 10 faiz artım nümayiş etdirib.
Bu ilin ilk səkkiz ayının nəticələrinə əsasən, Azərbaycan-Rusiya ticarət dövriyyəsində 13,5 faiz artım qeydə alınıb və ümumi dövriyyə 3 milyard 350 milyon ABŞ dollarına yaxınlaşıb. Bu fakt göstərir ki, ticarət dövriyyəsindəki artım dinamikası qorunub saxlanılır. Praktik olaraq sahibkarlar və iş adamları xarici ticarət fəaliyyətlərini əvvəlki illərlə müqayisədə daha geniş miqyasda həyata keçiriblər.
Növbəti dövrdə də Azərbaycan ilə Rusiya arasında iqtisadi əlaqələrin artan dinamika ilə davam edəcəyi gözlənilir. Proqnozlara görə, 2025-ci ildə də iki ölkə arasında ticarət dövriyyəsində artım müşahidə olunacaq".
Deputat həmçinin Azərbaycan və Rusiya arasında həm iqtisadi, həm də ticarət əlaqələrinin daha da genişlənəcəyini qeyd edib:
"Azərbaycan qonşu dövlətlərlə əməkdaşlığını dərinləşdirməkdə maraqlıdır. Bu kontekstdə Rusiya Azərbaycanın xarici ticarət dövriyyəsində mühüm yer tutur — ixracda ilk üçlükdə, idxalda isə ilk ikilikdə qərarlaşır.
Eyni zamanda, Rusiyanın da Azərbaycanla ticarət əlaqələrinin yaxın perspektivdə daha da genişlənəcəyi gözlənilir".
Elmir Heydərli
21:35 13.10.2025
Oxunuş sayı: 2086
