Bakıda Azərbaycan, Rusiya və İran arasında üçtərəfli görüş keçirilib
Bakı şəhərində Azərbaycan, Rusiya və İran hökumət nümayəndələrinin infrastruktur əməkdaşlığına həsr olunmuş üçtərəfli görüşü keçirilib.
Crossmedia.az xəbər verir ki, Rusiya Federasiyası Baş nazirinin müavini Aleksey Overçuk çıxışı zamanı görüşün təşkilinə görə Azərbaycan tərəfinə, eləcə də nümayəndə heyəti ilə qatıldığı üçün İran tərəfinə təşəkkür edib.
O bildirib ki, tərəflər regionda nəqliyyat əlaqələrinin gücləndirilməsi istiqamətində birgə fəaliyyət göstərirlər: “Biz birgə səylərlə ‘Şimal–Cənub’ Beynəlxalq Nəqliyyat Dəhlizinin Qərb marşrutu üzrə işləri davam etdiririk. Bu istiqamətdə uğur birgə əməkdaşlığımızdan asılıdır."
Overçukun sözlərinə görə, Azərbaycan, Rusiya və İran avtomobil buraxılış məntəqələrinin ötürücülük qabiliyyətinin artırılması istiqamətində də birgə çalışır.
O, həmçinin qeyd edib ki, ötən ilin sonunda Azərbaycanla tranzit daşımalarının inkişafına dair hökumətlərarası saziş imzalanıb. Bu sənədin əsas məqsədi “Şimal–Cənub” dəhlizi üzrə sabit yük axınının formalaşdırılmasıdır.
İran tərəfi ilə isə 2023-cü ildə imzalanmış saziş çərçivəsində Rəşt–Astara dəmir yolu hissəsinin tikintisi davam etdirilir. Hazırda peyk ölçmələri, səviyyələndirmə işləri və nəticələrin emalı aparılır.
Rusiya, Azərbaycan və İran dəmir yolları “Şimal–Cənub” dəhlizinin Qərb marşrutu üzrə multimodal konteyner xidmətinin texnologiyalarını sınaqdan keçirir.
Türkan Kərimli
12:50 13.10.2025
Oxunuş sayı: 2680
