Pakistan və Əfqanıstan sərhədində gərgin döyüşlər baş verib
Pakistanla Əfqanıstan sərhədində silahlı toqquşmalar baş verib.
Crossmedia.az xəbər verir ki, bu barədə “Dawn” qəzeti təhlükəsizlik qüvvələrindəki mənbələrə istinadən məlumat yayıb.
Bildirilib ki, Əfqanıstan qüvvələrinin təxribat xarakterli hücumlarından sonra Pakistan ordusu sərt cavab tədbirləri görüb və bir neçə sərhəd məntəqəsinə zərbələr endirib.
Məlumata görə, qarşıdurma zamanı artilleriya, tanklar və ağır silahlardan istifadə olunub. Pakistan ordusunun məlumatına əsasən, cavab atəşləri nəticəsində bir neçə əfqan postu və döyüşçü qruplaşmaların mövqeləri məhv edilib.
Əfqanıstan Müdafiə Nazirliyi də sərhəddə baş verən hadisəni təsdiqləyərək, Pakistan qüvvələrinə qarşı “cavab əməliyyatları” keçirdiyini bildirib.
Qeyd olunur ki, son günlər Pakistan ərazisində törədilən silsilə terror aktları nəticəsində bir neçə hərbçi həlak olub. İslamabad bu hücumları Əfqanıstan ərazisində fəaliyyət göstərən silahlı qruplaşmalarla əlaqələndirir və Kabil hökumətindən onların sığınacaq tapmasının qarşısını almağı tələb edir.
Pakistanın daxili işlər naziri Mohsin Nakvi sərhəddəki toqquşmalarla bağlı açıqlamasında bildirib ki, “əfqan qüvvələrinin mülki əhaliyə atəş açması beynəlxalq hüququn kobud pozulmasıdır” və Pakistan ordusunun cavabı “operativ və təsirli” olub.
“Radio Pakistan”ın məlumatına görə, ordunun cavab əməliyyatları nəticəsində Əfqanıstan tərəfinin 19 postu ələ keçirilib və bir neçə düşərgə tamamilə məhv edilib.
Mənbələrin bildirdiyinə görə, toqquşma zamanı onlarla əfqan hərbçisi və silahlısı məhv edilib, qalanları isə ərazini tərk edib.
Türkan Kərimli
14:23 12.10.2025
Oxunuş sayı: 2082
