Rusiya Prezidentinin açıqlamaları göstərir ki, təyyarə insidenti ilə bağlı məsələlər həll olunub- Deputat
Azərbaycan–Rusiya münasibətləri son aylarda regiondakı siyasi gündəmin əsas mövzularından biri olub. Xüsusilə baş verən hadisələr fonunda iki ölkə arasında diplomatik əlaqələrin gələcək istiqaməti diqqət mərkəzinə çevrilib. Lakin qarşılıqlı hörmət, siyasi iradə və yüksək səviyyəli dialoq bu münasibətlərin yenidən konstruktiv məcraya dönməsinə şərait yaradıb. Son görüşlər göstərdi ki, Bakı və Moskva tərəfləri həm regional təhlükəsizlik, həm də ikitərəfli əməkdaşlıq məsələlərində ortaq məxrəcə gəlmək niyyətindədirlər.
Mövzu ilə bağlı Milli Məclisinin deputatı Nigar Məmmədova Crossmedia.az-a açıqlama verib:
"Azərbaycan və Rusiya münasibətlərində ötən ilin dekabrında baş verən məlum təyyarə qəzası ilə bağlı gərginlik pik həddə çatdı. Rəsmi Bakı haqlı tələblər irəli sürərək, Moskvadan adekvat addımlar atmasını gözləyirdi. Bu müddət ərzində Rusiyadakı bəzi qərəzli dairələr, ermənipərəstlər ikitərəfli münasibətlərin daha da soyuqlaşması istiqamətində əlindən gələni etdi. Eyni zamanda soydaşlarımıza qarşı aqressiv davranışlar haqlı olaraq Azərbaycan cəmiyyəti və dövləti tərəfindən hiddətlə qarşılandı.
İki gün əvvəl Tacikistanın paytaxtı Düşənbədə MDB dövlət başçılarının sammiti çərçivəsində Azərbaycan və Rusiya prezidentlərinin görüşü baş tutdu. Bu görüş və aparılmış müzakirələrə baxsaq, ikitərəfli münasibətlərin normal məcraya yönəldiyini söyləyə bilərik. Rusiya Prezidentinin məlum açıqlamaları isə təyyarə insidenti ilə bağlı məsələlərin həll olunduğunu deməyə əsas verir. Belə ki, Rusiya Prezidenti Vladimir Putin Azərbaycan Hava Yollarının təyyarəsinin keçən ilin dekabrında qəzaya uğraması ilə bağlı faciə haqqında cənab Prezidentə ətraflı məlumat verdi və aydın oldu ki, bu, ən son məlumatlardır. Belə ki, Rusiya Prezidentinin bu görüş ərəfəsində məsələ ilə xüsusi maraqlanması, hətta Tacikistanda səfərdə olarkən Moskvaya zəng edərək, əlavə detalları soruşması qarşı tərəfin Azərbaycanın bu məsələdə həsassiyyətini qəbul etdiyini göstərir”.
Parlamentari söyləyib ki, Rusiya dövlət başçısı bir daha qəza ilə bağlı başsağlığını çatdırdı, qəzadan sonra telefon danışığı zamanı üzr istədiyini xatırlatdı: “Baş vermiş hadisə üzrə araşdırma isə davam edir. Ən əsası, görüşdə bir daha rəsmi şəkildə bəyan olundu ki, faciə ilə bağlı kompensasiyalar ödəniləcək və günahkarlar cəzalandırılacaq. Hesab edirəm ki, bu görüşdən sonra qəza ilə bağlı araşdırmalar daha da sürətlənəcək. Belə olan halda münasibətlərin getdikcə tam normallaşacağını söyləmək olar".
Ayhan
20:39 11.10.2025
Oxunuş sayı: 1906
