Azərbaycan-Türkiyə xüsusi təyinatlıları Sualtı Hücum və Sualtı Müdafiə prosesində hərəkətə keçdi - RƏY
Azərbaycan və Türkiyə arasında hərbi əməkdaşlıq çərçivəsində yeni birgə təlim keçiriləcək. Oktyabrın 13-dən 17-dək planlaşdırılan SAT-SAS (sualtı hücum və sualtı müdafiə) xüsusi təlimləri iki ölkənin dəniz qüvvələrinin birgə fəaliyyət imkanlarını artırmağı hədəfləyir. Bu barədə Türkiyə Milli Müdafiə Nazirliyinin sözçüsü Zeki Aktürk məlumat verib.
Mövzu ilə bağlı hərbi ekspert Üzeyir Cəfərov Crossmedia.az-a açıqlama verib. Ü.Cəfərov təlimlərin xüsusi təyinatlılar üçün böyük təcrübə məktəbi olduğunu bildirib: “Azərbaycan-Türkiyə arasında hərbi əməkdaşlıq çərçivəsində hər il çoxsaylı təlimlər keçirilir. Bu il üçün nəzərdə tutulan təlimlərdən biri isə xüsusi təyinatlı qüvvələrə – SAT bölmələrinə aiddir. Bu, əsasən sualtı təlimlərdir. Yəni xüsusi təyinatlıların sualtı şəraitdə müxtəlif tapşırıqları yerinə yetirməsi ilə bağlıdır və Azərbaycanla Türkiyənin dəniz qüvvələrinin birgə fəaliyyət planı çərçivəsində həyata keçirilir.
Bu işlə Azərbaycanda Müdafiə Nazirliyinin Hərbi Dəniz Qüvvələrinin xüsusi təyinatlı bölmələri – yəni SAT qüvvələri məşğul olur. Onlar bu təlimlərdə həm ölkə daxilində, həm də xaricdə mütəmadi iştirak edirlər. Bu təlimlərin bizim qüvvələr üçün böyük əhəmiyyəti var. Çünki Türkiyə Milli Müdafiə Nazirliyinin tabeliyində olan qüvvələr hər il NATO çərçivəsində çoxsaylı beynəlxalq təlimlərdə iştirak edirlər. Onların bu sahədə təcrübəsi daha genişdir.
Azərbaycanın dəniz xüsusi təyinatlıları isə bu sahədə son illərdə daha aktiv şəkildə fəaliyyətə başlayıblar. Qardaş ölkədə bu təlimlər uzun illərdir keçirilir, bu səbəbdən Türkiyə təcrübəsinin paylaşılması bizim üçün çox önəmlidir. Bu təlimlər həm təcrübə, həm də bilik və bacarıqların artırılması baxımından böyük əhəmiyyət daşıyır.
Son vaxtlar Xəzər dənizində sualtı əməliyyatlara dair fəaliyyətlərin planlaşdırılması da gündəmdədir. Buna görə də bu sahəyə xüsusi diqqət ayrılması gözlənilir. Hesab edirəm ki, SAT – yəni Sualtı Hücum və Sualtı Müdafiə xüsusi təyinatlıları bu təlimlər vasitəsilə öz bilik və vərdişlərini daha da təkmilləşdirəcəklər.
Ümumiyyətlə, Azərbaycan-Türkiyə hərbi əməkdaşlığında bu istiqamət yeni bir mərhələdir. Əvvəllər Türkiyə mütəxəssisləri bizim hərbi qulluqçuların hazırlığında yaxından iştirak edirdilər. İndi isə artıq bizim öz qüvvələrimiz müəyyən məktəb və hazırlıq mərhələlərini keçirlər və ölkə daxilində bu proses genişlənir.
Bu təlimlərə həm Müdafiə Nazirliyi, həm də Dövlət Sərhəd Xidmətinin xüsusi diqqət ayırması da təsadüfi deyil. Çünki hər iki qurumun suda fəaliyyət göstərən bölmələri – Hərbi Dəniz Qüvvələri və Sahil Mühafizə Xidməti – birbaşa bu təlimlərdə iştirak edir. Gözlənilir ki, növbəti illərdə bu təlimlər daha geniş tərkibdə və daha mürəkkəb tapşırıqlarla davam etdiriləcək. Artıq bu istiqamətdə müəyyən razılıqlar əldə olunub və nümayəndə heyətlərinin qarşılıqlı səfərləri də həyata keçirilib.
Bir sözlə, bu təlimlərin çox böyük əhəmiyyəti var. Onlar adi təlimlərdən fərqlənir, çünki həm xüsusi təyinatlılar iştirak edir, həm də təlimlər çətin relyefli sualtı şəraitdə – dəniz akvatoriyasında həyata keçirilir. Buna görə də bu təlimlərin strateji və praktiki dəyəri olduqca yüksəkdir”.
Nicat Rüstəmzadə
17:34 11.10.2025
Oxunuş sayı: 1419
