Səməd Seyidov: TDT üçün ən aparıcı rollardan birini Azərbaycan oynayır
Azərbaycan Prezidenti İlham Əliyev Türk Dövlətləri Təşkilatının
(TDT) Dövlət Başçıları Şurasının 12-ci Zirvə Görüşündə çıxışında bu təşkilatı
qlobal arenada vacib aktora çevirən amilləri sadalayıb.
Dövlət başçısı deyib: "Daxili siyasi və iqtisadi sabitlik, əhəmiyyətli geostrateji mövqe, müsbət demoqrafiya və gənc əhali, nəqliyyat-logistika sahəsində böyük imkanlar, təbii resurslar, habelə hərbi və hərbi-texniki sahədə artan potensial TDT-ni qlobal arenada vacib aktora çevirir".
Məlum olduğu kimi, TDT -nin dünyadakı nüfuzu getdikcə artır. TDT artıq qlobal bir təşkilat kimi özünü doğrultmaqdadır. Azərbaycan, Türkiyə qurumun aparıcı üzvləri kimi təşkilatın güclənməsində müstəsna rol oynayır.
Milli Məclisin Beynəlxalq Münasibətlər və parlamentlərarası əlaqələr komitəsinin sədri Səməd Seydov dövlət başçısının səsləndirdiyi fikirlər barədə Crossmedia.az-ın suallarını cavablandırıb:
- Prezident İlham Əliyev TDT-ni qlobal arenada vacib aktora çevirən amilləri sadalayıb. Həmin amillər arasında müsbət demoqrafiya və gənc əhali amili xüsusilə vurğulanıb. Sizcə, Gənc əhalinin çoxluğu və ortaq dil-mədəniyyət faktoru Türk dövlətlərinin gələcək əməkdaşlığında hansı üstünlükləri təmin edir?
- Bu, çox böyük və əhəmiyyətli faktordur. Gənc əhaliyə malik olan və onların gələcəyini, mövcudluğunu təmin edən ölkələrin beynəlxalq səviyyədə gücü, nüfuzu və təsiri yüksək səviyyədə olacaq. Dünyada indiki zamanda iki tendensiya mövcuddur. Təəssüf ki, Avropada gənclər əhalinin çoxluğunu təşkil etmir. Bunun müxtəlif səbəbləri var və bu proses təhlükəli olmaqla yanaşı, ciddi problemlər yaradır. Günümüzdə demoqrafik problemlər Avropanın əsas məsələlərindən biridir. İkinci kateqoriyaya isə Yaxın Şərq, Afrika və digər qitələrdə yerləşən, gənc əhalinin çoxluq təşkil etdiyi ölkələri aid etmək olar. Lakin bu ölkələrdə mövcud gəncliyi beynəlxalq səviyyədə təhsil, səhiyyə və digər sahələrdə təmin etmək böyük çətinlik yaradır. Bu səbəbdən belə dövlətlər davamlı və dayanıqlı inkişaf edə bilmirlər.
- Bəs Türk dövlətlərində vəziyyət necədir?
- Türk
dövlətləri isə tamamilə fərqli mövqedədir. Əhalinin böyük hissəsini gənclər təşkil
edir. Bu ölkələr həm gəncləri və onların gələcəyini düşünür, həm də onlara
bütün mümkün şəraiti yaratmağa çalışırlar.
- Bəü Azərbaycan TDT-nin güclənməsində hansı əsas rolu
oynayır?
- TDT üçün ən aparıcı rollardan birini Azərbaycan oynayır. Azərbaycanın ən vacib rollarından biri Türküstanı, yəni Mərkəzi Asiyanı və Türkiyəni bir-biri ilə birləşdirən əsas həlqələrdən biri olmasıdır. Bu, sadəcə coğrafi nöqteyi-nəzərdən deyil, həm də dəyərlər sistemi və inkişaf perspektivləri baxımından da əsas həlqələrdən biridir. Bununla yanaşı, məhz Azərbaycanın apardığı siyasət yalnız Türk dövlətlərini bir-biri ilə deyil, eyni zamanda Türk dünyasını digər dövlətlərlə birləşdirən ən mühüm bağlantılardan birinə çevrilib. Məsələn, Azərbaycan-Avropa münasibətləri faktiki olaraq Türk dünyası-Avropa münasibətlərinə, Azərbaycan-Amerika əlaqələri isə Türk dünyası-Amerika əlaqələrinə çevrilib.
Fatimə Hacıəliyeva
12:43 09.10.2025
Oxunuş sayı: 1300
