Azərbaycan xalqı sübut etdi ki, o, təkcə qalib xalq deyil, həm də qurucu, yaradıcı xalqdır - Deputat
Azərbaycanın müasir tarixi Müzəffər Ali Baş Komandan cənab İlham Əliyevin rəhbərliyi ilə yazılmış Zəfər səhifələri ilə zəngindir. 2020-ci ilin payızında 44 gün davam edən Vətən müharibəsi xalqımızın birlik və əzmkarlığının, ordumuzun qüdrətinin parlaq təcəssümünə çevrildi. Bu tarixi döyüşlərdə azad edilən hər bir rayon, hər bir kənd Azərbaycan xalqının yaddaşına qürur, sevinc və fəxarət hissi ilə həkk olundu.
Bu Zəfərin ən mühüm mərhələlərindən biri isə Cəbrayıl rayonunun işğaldan azad edilməsi idi. Cəbrayıl uğrunda gedən döyüşlər Azərbaycan əsgərinin mərdliyini, cəsarətini və Vətənə sonsuz məhəbbətini bir daha nümayiş etdirdi. Bu qələbə həm hərbi, həm də mənəvi baxımdan böyük əhəmiyyət daşıyır, çünki Cəbrayılın azad olunması bütövlükdə Qarabağın azadlığına aparan yolun başlanğıcı oldu.
Tarixi gün ilə bağlı Crossmedia.az-a açıqlama verən Milli Məclisin deputatı Aydın Mirzəzadə Cəbrayılın işğaldan azad edilməsi təkcə cəbrayıllıları deyil, bütün Azərbaycan xalqını ürəkdən sevindirdiyini qeyd edib:
"Şəhərin azad olunması asan deyildi, lakin Azərbaycan əsgəri bu çətin və şərəfli missiyanı uğurla yerinə yetirdi. Uzun illər ərzində Azərbaycan dövləti, Prezident, Müzəffər Ali Baş Komandan cənab İlham Əliyevin rəhbərliyi ilə ordumuzu qələbəyə hazırladı və nəticədə Azərbaycan əsgəri öz igidliyini, cəsarətini və qəhrəmanlığını parlaq şəkildə nümayiş etdirdi.
İşğal dövründə Ermənistan Cəbrayıl ətrafında öz fikrincə möhkəm müdafiə sədləri, istehkam xətləri qurmuşdu. Lakin bu istehkamlar Azərbaycan Ordusunun gücü, iradəsi və peşəkarlığı qarşısında tab gətirə bilmədi. Digər tərəfdən, erməni əsgəri özgə torpaqda olduğunu dərk edir, bu isə onun döyüş ruhunu sındırırdı.
Təsadüfi deyil ki, 44 günlük Vətən müharibəsi dövründə 10 mindən çox erməni hərbçisi fərari kimi tanındı. Ermənistan bu gün də onlarla bağlı nə etmək lazım gəldiyini müəyyənləşdirməkdə aciz qalır. Cəbrayılın azad edilməsindən sonra ardıcıl şəkildə digər yaşayış məntəqələrimiz də düşməndən təmizləndi. Xankəndinin, bütövlükdə Qarabağın azad olunması ilə Azərbaycan tarixi Zəfərini tamamladı".
Deputat həmçinin bu günün həmin müqəddəs torpaqlarda genişmiqyaslı quruculuq və bərpa işləri aparıldığını bildirib.
"Azərbaycan xalqı sübut etdi ki, o, təkcə qalib xalq deyil, həm də qurucu, yaradıcı xalqdır. Cəbrayılda bu gün həyat qaynayır, yeni yaşayış məntəqələri salınır, infrastruktur bərpa olunur, biznes fəaliyyəti genişlənir. İnsanlar öz doğma torpaqlarını daha firavan, daha güclü və daha gözəl görmək üçün böyük ruh yüksəkliyi ilə çalışırlar". - deyə o əlavə edib.
Elmir Heydərli
14:25 04.10.2025
Oxunuş sayı: 3466
