Gəncə şəhərinə ilk raket zərbəsindən beş il ötür
İkinci Qarabağ müharibəsi zamanı Ermənistan Silahlı Qüvvələrinin Gəncə şəhərinə ilk raket zərbəsindən beş il ötür.
Crossmedia.az xatırladır ki, 2020-ci il oktyabrın 4-də, saat təxminən 10:00 radələrində Ermənistan tərəfindən həyata keçirilən raket hücumu nəticəsində Azərbaycanın ikinci böyük şəhərində - Gəncədə fərdi yaşayış evləri və iki mərtəbəli bina zərər görmüşdü.
Bu, Ermənistan Silahlı Qüvvələrinin döyüş bölgəsindən uzaqda yerləşən əraziyə ilk raket hücumu idi. Hücum nəticəsində dinc sakin Əliyev Tunar Qoşqar oğlu həlak olub, daha 32 mülki şəxs yaralanıb. Yaşayış evləri, mülki infrastruktur və tarixi binalar dağıdılıb.
Qeyd edək ki, 2020-ci ilin payızında baş vermiş Vətən müharibəsi zamanı Ermənistan silahlı qüvvələri Gəncəyə ümumilikdə beş dəfə artilleriya və raket zərbələri endirib – 4, 5, 8, 11 və 17 oktyabr tarixlərində. Bu hücumlar nəticəsində 26 nəfər həyatını itirib, 175 nəfər yaralanıb, mülki infrastruktur və nəqliyyat vasitələri ciddi şəkildə zədələnib.
10:02 04.10.2025
Oxunuş sayı: 3045
