Yaxın illərdə Azərbaycan–Gürcüstan münasibətləri daha da dərinləşəcək - Deputat
Cənubi Qafqaz regionunda siyasi sabitlik və mehriban qonşuluq münasibətləri
xüsusi əhəmiyyət daşıyır. Gürcüstanın Baş naziri İrakli Kobaxidzenin
Kopenhagendə verdiyi açıqlama da bu baxımdan diqqət çəkir. O, Azərbaycanla
strateji tərəfdaşlıq və dostluq əlaqələrinin qorunub inkişaf etdirilməsinin
vacibliyini vurğulayaraq, bölgədə sülhün təşviqini Gürcüstanın əsas
missiyalarından biri kimi dəyərləndirib. Bu yanaşma, iki ölkə arasında mövcud əməkdaşlığın
gələcək perspektivlərini və regional təhlükəsizlik üçün önəmini ortaya qoyur.
Mövzu ilə bağlı Crossmedia.az-a açıqlama verən Milli Məclisin
deputatı Azər Kərimli bildirib ki, Gürcüstanın Baş naziri İrakli Kobaxidzenin
Azərbaycanla münasibətlərin inkişafına dair verdiyi açıqlamalar, eləcə də
Kopenhagendə azərbaycanlı jurnalistlərə “yaxşı münasibətlərimizin olmasından məmnunuq”
fikirlərini səsləndirməsi iki ölkə arasında dostluq və strateji tərəfdaşlığın
davamlı və qarşılıqlı fayda əsasında inkişaf etdiyini təsdiqləyir:
“Bu kimi bəyanatlar həm siyasi dialoqun yüksək səviyyədə olduğunu
göstərir, həm də gələcək əməkdaşlıq üçün mühüm zəmin yaradır. Gürcüstan üçün Azərbaycan
yalnız qonşu deyil, həm də etibarlı enerji tərəfdaşı və regional sabitliyin
vacib iştirakçısıdır”.
Deputat qeyd edib ki, Azərbaycan–Gürcüstan strateji tərəfdaşlığı
enerji, nəqliyyat, logistika, qarşılıqlı ticarət, regional təhlükəsizlik və digər
sahələrdə uğurla inkişaf edir: “Bakı–Tbilisi–Ceyhan neft kəməri,
Bakı–Tbilisi–Ərzurum qaz kəməri, Bakı–Tbilisi–Qars dəmir yolu kimi layihələr bu
əməkdaşlığın əsas sütunlarıdır. Bu layihələr yalnız iki ölkə üçün deyil, həm də
bütün Cənubi Qafqaz və daha geniş anlamda Avropa ilə Asiyanın inteqrasiyası
baxımından strateji əhəmiyyət daşıyır. Azərbaycan qazının Avropa bazarına
Gürcüstan üzərindən çıxarılması Avropanın enerji şaxələndirilməsinə ciddi töhfə
verir. Bu kimi layihələr regionun strateji mövqeyini möhkəmləndirir və Qərb ilə
Şərq arasında alternativ enerji və yükdaşıma yolları yaradır”.
Onun sözlərinə görə, hər iki ölkə arasında ticarət dövriyyəsi ildən-ilə
artmaqda, biznes əməkdaşlığı isə dərinləşməkdədir: “Qarşılıqlı hörmət və
suverenlik prinsiplərinə əsaslanan diplomatik münasibətlər sabit və güclü tərəfdaşlığın
təməlini təşkil edir. Fikrimcə, münasibətlərin daha da möhkəmlənməsi üçün təhsil
və mədəniyyət mübadiləsi, innovasiya və rəqəmsal texnologiyalar, eləcə də
turizm kimi sahələrə diqqət artırılmalıdır. Əminəm ki, yaxın illərdə Azərbaycan–Gürcüstan
münasibətləri daha da dərinləşəcək”.
Mehriban Yariyeva
18:36 03.10.2025
Oxunuş sayı: 8029
