Talış və Suqovşanın azad olunması Vətən müharibəsində həlledici məqamlardan biri kimi tarixə düşdü - Deputat
2020-ci
ilin payızında başlayan Vətən müharibəsi Azərbaycanın hərb tarixinə qızıl hərflərlə
yazılmış bir qəhrəmanlıq salnaməsi oldu. Müharibənin ilk günlərindən Azərbaycan
Ordusu düşmən üzərində üstünlüyünü nümayiş etdirərək, uzun illər işğal altında
saxlanılan torpaqlarımızın azad olunması istiqamətində ardıcıl uğurlara imza
atdı. Bu uğurlar sırasında Talış və Suqovşan kəndlərinin azad olunması xüsusi
önəm kəsb edir.
Müharibənin birinci həftəsində qazanılan bu qələbə həm strateji mövqelərin ələ keçirilməsi, həm də xalqımızda böyük ruh yüksəkliyi yaradılması baxımından mühüm hadisə kimi yadda qaldı. Talış və Suqovşan kəndləri yalnız adi yaşayış məntəqələri deyildi onların coğrafi mövqeyi, strateji yüksəkliklərə nəzarət imkanı və su ehtiyatlarının yerləşdiyi ərazi olması bu kəndləri region üçün xüsusi əhəmiyyətli edirdi. Elə buna görə də Ermənistan tərəfi uzun illər ərzində burada möhkəmləndirilmiş istehkamlar, yeraltı keçidlər və müdafiə qurğuları inşa etmişdi. Lakin Azərbaycan Ordusunun gücü və əsgərlərimizin qəhrəmanlığı nəticəsində bu istehkamlar qısa müddətdə yarıldı, düşmən ciddi itkilər verərək geri çəkilməyə məcbur oldu.
Eyni zamanda Suqovşanda yerləşən su anbarı üzərində nəzarətin bərpa olunması da strateji baxımdan son dərəcə vacib idi. İşğal dövründə ermənilər bu anbardan istifadə edərək Azərbaycanın Tərtər, Bərdə, Goranboy rayonlarında suvarma işlərinə mane olur, bəzən isə suyu süni şəkildə buraxaraq kənd təsərrüfatına ciddi ziyan vururdular. Bu mənada Talış və Suqovşanın azad edilməsi yalnız hərbi uğur deyil, həm də sosial-iqtisadi baxımdan böyük əhəmiyyət daşıyan hadisə idi.
Beləliklə, Vətən müharibəsinin ilk günlərində qazanılan bu möhtəşəm zəfər həm növbəti mərhələlərdə daha böyük qələbələrin təməlini qoydu, həm də xalqın inamını və döyüş ruhunu daha da gücləndirdi.
Tarixi gün ilə bağlı Crossmedia.az-a açıqlama verən Milli Məclisin deputatı Azər Allahverənov Talış və Suqovşan kəndlərinin Vətən müharibəsinin ilk həftəsində azad olunmasının olduqca mühüm və strateji əhəmiyyətə malik hadisə kimi dəyərləndirildiyini qeyd edib:
"Bu hadisəyə müxtəlif aspektlərdən yanaşdıqda görürük ki, həqiqətən də Talış və Suqovşanın azadlığı müharibənin gedişatında daha böyük zəfərlərin qazanılması üçün kifayət qədər ciddi impuls verdi.
Əvvəla, Talış və Suqovşan kəndləri strateji baxımdan çox mühüm bir coğrafi mövqedə yerləşirdi. Ermənistan tərəfi bu ərazilərdə xüsusi istehkam xətləri qurmuş, tunellər, yeraltı keçidlər və digər müdafiə qurğuları inşa etmişdi. Məqsəd Azərbaycan ordusunun mümkün irəliləyişinin qarşısını almaq idi. Lakin bütün bu istehkamlar Azərbaycan əsgərinin qəhrəmanlığı və Ordumuzun gücü qarşısında aciz qaldı və nəticədə parlaq bir qələbə əldə olundu.
Bu qələbə isə həm hərbi, həm də siyasi müstəvidə bir sıra mühüm nəticələr doğurdu. Birincisi, Talış və Suqovşan böyük əraziyə nəzarət imkanı verən yaşayış məntəqələri idi. İkincisi, Suqovşanda yerləşən su anbarı strateji əhəmiyyət daşıyırdı. İşğal dövründə ermənilər həmin anbardan istifadə etməklə Azərbaycanın Tərtər, Bərdə, Goranboy rayonlarında suvarma işlərinə mane olur, şluzları bağlayaraq suyu əkin sahələrinə buraxmır, bəzən də əksinə – qış fəslində şluzları açaraq sahələri məhv edirdilər. Bu, əslində bir növ “hidroterror” idi. Müharibə zamanı da düşmən ordusunun planlarından biri suyun buraxılması yolu ilə geniş əraziləri su altında qoymaq idi. Lakin Azərbaycan ordusunun sürətli əməliyyatları nəticəsində həmin su anbarı üzərində nəzarət bərpa edildi.
Bu gün həmin anbar üzərində qurulan su elektrik stansiyaları geniş ərazini enerji ilə təmin etməkdədir. Beləliklə, Azərbaycanın təbii ehtiyatları daha səmərəli şəkildə istifadə olunur. Bu baxımdan Talış və Suqovşanın azad olunması həm strateji yüksəkliklərə nəzarət, həm də su ehtiyatlarına və yollar üzərində üstünlük qazanmaq baxımından olduqca mühüm idi.
Digər tərəfdən, müharibənin ilk həftəsində belə böyük qələbənin əldə olunması xalq arasında ruh yüksəkliyi yaratdı və sonrakı şəhərlərin azadlığına aparan zəfər yolunda mühüm dönüş nöqtəsinə çevrildi. Ermənistan mediasında da dəfələrlə qeyd olunmuşdu ki, Talış-Suqovşan istiqamətində gedən ağır döyüşlərdə erməni əsgərləri Azərbaycan Ordusunun hücumlarına tab gətirməyərək geri çəkilmiş, hətta fərarilik halları müşahidə olunmuşdu. Bu faktlar həmin zəfərin miqyasını bir daha təsdiqləyirdi.
Azərbaycan Respublikasının Prezidenti də o zaman bu xoş xəbəri özünün rəsmi “Twitter” (indiki X) hesabından xalqımıza çatdırmışdı".
Deputat həmçinin Talış və Suqovşanın azad olunmasının Vətən müharibəsində həlledici məqamlardan biri kimi tarixə düşdüyünü bildirib.
"Nəticə etibarilə, Talış və Suqovşanın azad olunması Vətən müharibəsində həlledici məqamlardan biri kimi tarixə düşdü. Bu zəfərlə Azərbaycan Ordusu həm hərbi gücünü, həm də mənəvi üstünlüyünü nümayiş etdirdi. Həmin istiqamətdə Tərtər, Bərdə və Goranboy rayonlarına olan mümkün təhlükələr də müharibənin ilk həftəsində aradan qaldırıldı.
Bu
gün həmin döyüşlərdə qəhrəmancasına canından keçmiş şəhidlərimizi dərin hörmətlə
yad edirik, onların ruhu qarşısında baş əyirik. Qazilərimizə isə uzun ömür və
sağlamlıq arzulayırıq. Azərbaycan əsgərinin qəhrəmanlığı Talış və Suqovşan
döyüşlərində bir daha bütün dünyaya sübut olundu"- deyə o əlavə edib.
Elmir
Heydərli
18:04 03.10.2025
Oxunuş sayı: 10480
