MDB Oyunları: Azərbaycanın 24 boksçusu yarımfinalda mübarizə aparacaq
Azərbaycanın ev sahibliyi etdiyi III MDB
Oyunlarının boks yarışlarında 1/4 final mərhələsinə yekun vurulub.
Crossmedia.az xəbər verir ki, Yevlax Olimpiya İdman
Kompleksində təşkil olunan turnirdə Azərbaycan millisinin daha 6 idmançısı
yarımfinala vəsiqəni təmin edib.
Əli Əliyev (48 kq) 1/4 finalda
Muhammedali Kanibekovla (Qırğızıstan) qarşılaşıb. Boksçumuz rəqibini 5:0
(30:27, 30:27, 30:27, 30:27, 30:27) hesabı ilə məğlub edib. O, yarımfinalda
Baltin Korqanbeklə (Qazaxıstan) üz-üzə gələcək.
Əflatun İsmiyev (57 kq) Artyom
Pançenkadan (Belarus) güclü olub. O, rinqdən 4:1 (29:28, 29:28, 29:28, 30:27,
27:30) hesablı qələbə ilə ayrılıb. İsmiyev finala gedən yolda Akbarjon
Abdulloyevlə (Tacikistan) döyüşəcək.
Eyni çəki dərəcəsində Raul Heydərli də
Oyunlara qələbə ilə başlayıb. Boksçumuz Ulas Alimjanı (Qazaxıstan) mübarizədən
kənarlaşdırıb – 4:1 (28:29, 29:28, 29:28, 29:28, 29:28). O, yarımfinalda
Bobomurod Boymirzayevlə (Özbəkistan) münasibətinə aydınlıq gətirəcək.
Toğrul Quliyev (60 kq) Muhammedemin
Beqenjovla (Türkmənistan) dueldən qalib ayrılıb. O, üçüncü raundda tam
üstünlüklə qələbə qazanıb. Quliyev yarımfinalda Otabek Nurmahamadovu
(Özbəkistan) sınağa çəkəcək.
Şahin Aslanov (60 kq) MDB Oyunlarının
1/4 finalında Yusuf Qurbonova (Tacikistan) gücünü göstərib. 4:1 (30:27, 30:27,
30:27, 28:29, 30:27) hesabı ilə qələbə qazanan boksçumuz yarımfinalda Dmitri
Klyuşnikovla (Rusiya) qüvvəsini sınayacaq.
Əli Abaslı (52 kq) isə yarımfinal
yolunda Xudaverdi Abidjanovu (Qırğızıstan) məğlub edib – 5:0 (30:27, 30:27,
30:27, 30:27). Boksçumuz növbəti görüşünü Xangeldi Lukmanova (Türkmənistan)
qarşı keçirəcək.
Beləliklə, MDB Oyunlarının
yarımfinalında mübarizə aparacaq Azərbaycan boksçularının sayı 24-ə yüksəlib.
Onlardan 14-ü oğlanların, 10-u qızların yarışında rinqə çıxacaqlar. Bu
idmançılar, həmçinin özləri üçün azı bürünc medalı təmin ediblər.
Qeyd edək ki, qız boksçuların yarımfinal
döyüşləri oktyabrın 2-də, oğlanların mübarizəsi ertəsi gün olacaq.(Report)
19:44 01.10.2025
Oxunuş sayı: 5965
