“Azərbaycanın Dayanıqlı Tikili Mühit Planı” mövzusunda dəyirmi masa keçirilib
Azərbaycanda tikinti sektoru 2022-ci ildə karbon qazı emissiyasının 16%-nə səbəb olub.
Crossmedia.az xəbər verir ki, bunu Bakı İqlim Fəaliyyəti Həftəsi çərçivəsində baş tutan “Azərbaycanın Dayanıqlı Tikili Mühit Planı” mövzusunda dəyirmi masanın gedişində "Built Enviorement" təşkilatının baş məsləhətçisi Alidə Saleh deyib.
Qlobal miqyasda tikinti sektoru ümumi istixana qazı emissiyalarının 21%-nin səbəbkarı olduğunu qeyd edən Alidə Saleh, eyni zamanda bu sahənin 2030-cu ilə qədər enerji intensivliyinin yaxşılasdirilmasi sürətini ikiqat artırmaq üçün lazım olan həllərin 40%-ni təmin etdiyini bildirib.
"Bina və tikililər bizi kəskin temperaturdan, fırtınalardan və yüksələn sel sularından qoruyur. Odur ki, tikinti sahəsinin vətəndaşlara fayda vermək potensialı heç vaxt kiçildilməməlidir", - Alidə Saleh bildirib.
BMT-nin Qlobal Sazişinin Azərbaycan üzrə rəhbəri Samir Məmmədovun sözlərinə görə, Azərbaycan Paris Sazişi və Qlobal Bərpa Olunan Enerji və Enerji Səmərəliliyi Öhdəliyi ilə öz üzərinə götürdüyü öhdəlikləri nümayiş etdirib. İndi isə icraya keçid mərhələsində hökumətin səylərini dəstəkləməkdə tikinti şirkətləri və sement istehsalçıları daxil olmaqla özəl sektorun rolu həyati əhəmiyyət daşıyır.
Bildirilib ki, COP29-a hazırlıq çərçivəsində Azərbaycanın aparıcı inşaat şirkətləri karbon qazı emissiyalarının 1,5 °C ilə məhdudlaşdırılması istiqamətində öz töhfələrini verməyə dair öhdəlik götürərək, BMT Qlobal Sazişi ilə əməkdaşlıqda “Azərbaycan Davamlı Tikili Mühit Yol Xəritəsi”ni hazırlamaq barədə razılığa gəliblər.
COP29-un İqlim üzrə Yüksək Səviyyəli Çempionu Nigar Arpadarai iqlim dialoqu, təşəbbüslərində tikinti sektorunun mühüm əhəmiyyət kəsb etdiyini qeyd edib.
"Bizim ücün ən önəmli özəl sektorun iqlim dialoquna yanaşmasıdır. Məhz ölkənin tikinti sektorunun nümayəndələri bizim təşəbbüslərə müsbət yanaşan və qoşulan ilk özəl sektor oldu",- Arpadarai bildirib.
Qeyd edək ki, dəyirmi masa "Azərbaycan Davamlı Tikili Mühit Yol Xəritəsi”nin müəlliflərini, “Net Zero Accelerator” sement istehsalçılarını və əsas sektor nümayəndələrini bir araya gətirərək, tikili mühitin dekarbonizasiyasında biznesin iştirakını gücləndirməyi və COP30-a qədər davamlı irəliləyişi təmin etməyi hədəfləyir.
15:25 01.10.2025
Oxunuş sayı: 2718
