Umayra Tağıyeva: İqlim dəyişikliyinin mənfi təsirlərini gələcəkdə görəcəyik
İqlim dəyişikliyi reallıqdır, gələcəkdə bunun mənfi təsirlərini görmək mümkün olacaq.
Crossmedia.az xəbər verir ki, bunu Azərbaycanın ekologiya və təbii sərvətlər nazirinin müavini Umayra Tağıyeva Bakı İqlim Fəaliyyəti Həftəsində (BCAW2025) çıxışı zamanı deyib.
Onun sözlərinə görə, dünya ölkələri artıq adaptasiya mərhələsinə keçməlidir:
"İqlim dəyişiliyi ilə bağlı Azərbaycanın adaptasiya planı var. COP29-da bu məsələ müzakirə edildi. Adaptasiya hədəflərində innovasiyalardan, müasir texnologiyalardan istifadə edilməlidir. Bəzi hallarda ekosistemə əsaslanan hədəflər daha effektiv nəticələr verə bilər".
Nazir müavini qeyd edib ki, iqlim sahəsində Azərbaycan BMT baş katibliyi ilə əməkdaşlıq edir, texniki dəstək alır:
"Azərbaycan iqlim dəyişikliyinin qarşısını almaq üçün daha çox layihələr hazırlayacaq və beynəlxalq məkana töhfə verməyə çalışacaq".
Umayra Tağıyeva Xəzər ölkələrinin İqlim dəyişikliyi ilə mübarizədə bərabər fəaliyyətinə diqqət çəkib.
13:13 29.09.2025
Oxunuş sayı: 2723
