Azərbaycan nüvə dövləti ilə əlaqələrini gücləndirir- Nazirlər masaya oturdu
Azərbaycanla Pakistan arasında münasibətlər tarixən dostluq və qarşılıqlı dəstək prinsiplərinə əsaslanır. Bu əməkdaşlıq beynəlxalq platformalarda da özünü göstərir. BMT Baş Assambleyasının 80-ci sessiyası çərçivəsində Azərbaycan xarici işlər naziri Ceyhun Bayramov ilə Pakistanın xarici işlər naziri Məhəmməd İshaq Dar arasında keçirilən görüş də iki ölkə arasında möhkəm dostluq və tərəfdaşlıq münasibətlərinin bariz nümunəsi kimi diqqət çəkir.
Bakı ilə İslamabad arasında münasibətlərin perspektivi barədə Crossmedia.az-a danışan Milli Məclisin deputatı Ceyhun Məmmədov bildirib ki, Azərbaycan–Pakistan əlaqələri hər zaman yüksək səviyyədə olub və strateji xarakter daşıyır:
"Bilirik ki, Azərbaycan–Pakistan münasibətləri hər zaman yüksək səviyyədə olub və strateji layihə xarakteri daşıyıb. Bu, həmişə özünü bütün istiqamətlərdə əməkdaşlığın çox sıx şəkildə göstərilməsində tapıb. Bu gün Azərbaycan–Pakistan münasibətləri dedikdə unikal əlaqədən və unikal nümunədən söhbət gedir. Azərbaycanın Pakistanla çox böyük əlaqələri var. Azərbaycanın bir sıra digər dövlətlərlə də əlaqəsi və münasibəti var. Bu da onu deməyə əsas verir ki, bizim əlaqələrimiz daha da sürətli formada inkişaf edir. Bunun çox ciddi əsasları var".
C.Məmmədovun sözlərinə görə, Pakistan hər zaman Azərbaycanın yanında olub, xüsusilə də Vətən müharibəsi dövründə ölkəmizin haqlı mövqeyini açıq şəkildə dəstəkləyib: "Pakistan hər zaman - Vətən müharibəsi dövründə və ondan əvvəlki illərdə Azərbaycanın yanında olub, onun mövqeyini dəstəkləyib. Bu, bizim üçün önəmli bir məsələdir. Bu gün də Pakistan bu dəstəyi davam etdirir. Yəni bütün sahələrdə biz bu dəstəyi, bu qardaş münasibətini, bu yanaşmanı açıq-aşkar görürük. Bu olduqca vacib, olduqca önəmli bir dəstəkdir".
Deputat bildirib ki, iki ölkə arasında əlaqələrin daha da möhkəmləndirilməsi və dərinləşdirilməsi istiqamətində görüşdə geniş müzakirələr aparılıb: "Bu gün bu əlaqələr, bu münasibətlər daha da inkişaf etməlidir, daha da inkişaf edəcək.Dəfələrlə qarşılıqlı səfərlər olub. Bu dəstək Azərbaycan üçün xüsusi önəm və əhəmiyyət daşıyıb və bu gündən sonra da daşıyacaq".
Mehriban Yariyeva
21:25 25.09.2025
Oxunuş sayı: 1075
