"Əsrin müqaviləsi" Azərbaycan dövlətinin inkişafında əbədiyaşar bir sənəddir - Deputat
1994-cü il sentyabrın 20-si Azərbaycan tarixində xüsusi əhəmiyyətə malik bir gündür. Bu gün imzalanmış Əsrin müqaviləsi müstəqil Azərbaycan dövlətinin iqtisadi müstəqilliyinin möhkəmlənməsi və dünya arenasında etibarlı tərəfdaş kimi tanınması baxımından əbədi iz buraxmışdır. Həmin müqavilə yalnız neft sənayesində yeni dövr açmamış, həm də ölkəmizin iqtisadi, siyasi və beynəlxalq mövqeyini gücləndirmişdir.
Məsələ ilə bağlı Crossmedia.az-a açıqlama verən Milli Məclisin deputatı Ziyad Səmədzadə "Əsrin müqaviləsi"-nin müstəqil Azərbaycan dövlətinin inkişafında əbədiyaşar bir sənəd olduğunu qeyd edib:
"1994-cü il sentyabrın 20-də imzalanmış "Əsrin müqaviləsi" müstəqil Azərbaycan dövlətinin inkişafında əbədi yaşar bir sənəd kimi qiymətləndirilir. Bu müqavilə sayəsində Azərbaycan öz təbii sərvətlərindən məqsədyönlü şəkildə istifadə etməyə başladı və iqtisadiyyatının əsaslarını möhkəmləndirdi.
"Əsrin müqaviləsi" müstəqil iqtisadi sistemin qurulması üçün ölkədə əlverişli şərait yaratdı və Azərbaycanın dünyaya çıxışını təmin etdi. Müqavilənin imzalanması Azərbaycanın enerji sektorunda qlobal nüfuzunun artmasına, neft məhsullarının dünya bazarlarına çıxarılmasına böyük töhfə verdi. Bakı-Tbilisi-Ceyhan, Bakı-Tbilisi-Ərzurum və digər boru kəmərləri Azərbaycanın qloballaşan dünyada neft ehtiyatlarını səmərəli istifadə edən ölkə kimi tanınmasına şərait yaratdı.
Ulu Öndər Heydər Əliyevin uzaqgörən siyasəti nəticəsində, "Əsrin müqaviləsi" ilə əldə olunan güclü valyuta gəlirləri əsasında 1999-cu ildə Dövlət Neft Fondu yaradıldı. Bu fond bu gün ölkəmizə milyardlarla vəsaitin səmərəli idarə olunmasını təmin edir. "Əsrin müqaviləsi" Azərbaycan üçün həm iqtisadi güc, həm də beynəlxalq nüfuz qazandırdı.
Azərbaycan-Türkiyə münasibətlərinin inkişafında, Avropanın enerji təhlükəsizliyində Azərbaycanın müstəsna rolunda "Əsrin müqaviləsinin" əhəmiyyəti xüsusi vurğulanmalıdır. Bu müqavilə həmçinin bütün dünyaya göstərdi ki, Azərbaycan investisiya qoymaq üçün əlverişli, etibarlı və stabil ölkədir".
"İllər keçsə də,"Əsrin müqaviləsi" Azərbaycan iqtisadiyyatının möhkəmlənməsində və davamlı inkişafında həlledici rol oynayan strateji sənəd olaraq qalacaq" - deyə o əlavə edib.
Elmir Heydərli
14:43 20.09.2025
Oxunuş sayı: 1004
