Bu gün dünya tarixində ən şərəfli tarixlərdən biridir - Deputat
Azərbaycan xalqının taleyində elə günlər var ki, onlar təkcə bir tarixi hadisə deyil, milli yaddaşın ən uca zirvəsinə çevrilir. 19–20 sentyabr 2023-cü il də məhz belə günlərdən biridir. Bu tarix Azərbaycan dövlətçiliyinin möhkəmlənməsini, xalqımızın azadlıq və ədalət uğrunda mübarizəsinin məntiqi nəticəsini əks etdirir. Uzun illər işğal altında qalan torpaqlarımızın azad olunması ilə başlayan böyük zəfər yolu həmin gün dövlətimizin tam suverenliyinin bərpası ilə tamamlandı. Bu gün Dövlət Suverenlik Günü ilə yanaşı Xocalı, Xocavənd, Xankəndi, Ağdərə şəhərləri günüdür.
Məsələ ilə bağlı Crossmedia.az-a açıqlama verən Milli Məclisin deputatı Aydın Mirzəzadə bu günün dünya tarixində ən şərəfli səhifələrindən biri olduğunu qeyd edib: "19–20 sentyabr 2023-cü il Azərbaycan üçün təkcə müasir tarixin deyil, ümumilikdə bütün tarixin ən şərəfli səhifələrindən biri kimi qiymətləndirilə bilər. Azərbaycan xalqı bu günə böyük əzmlə, fədakarlıqla, dövlət başçısının həyata keçirdiyi düzgün siyasətə sarsılmaz dəstək göstərməklə gəlib çatdı.
Ümummilli Lider Heydər Əliyevin möhkəm təməllər üzərində qurduğu Azərbaycan dövlətçiliyi, Prezident İlham Əliyevin həmin siyasəti qətiyyətlə və uğurla davam etdirməsi öz bəhrəsini verdi. Azərbaycan haqq səsini dünyaya tanıda bildi, güclü iqtisadiyyat və qüdrətli ordu qurdu, beynəlxalq aləmdə layiqli yerini möhkəmləndirdi.
Əvvəlcə 44 günlük Vətən müharibəsində əsas məsələlər öz həllini tapdı. Ermənistan tərəfinə yenidən şans verildi, lakin onlar bundan düzgün nəticə çıxarmadılar. Nəticədə bir günlük antiterror əməliyyatı ilə Azərbaycanda separatçılığa tamamilə son qoyuldu, dövlətimizin suveren hüquqları bütün ərazilərimizdə bərpa olundu.
Uzun illər həsrətlə gözlədiyimiz gün gəlib çatdı. Bu qələbəni bizə qəhrəman şəhidlərimiz və qazilərimiz qazandırdı. Bu tarixi zəfərdə dövlətimizin başçısının müdrikliyi və iradəsi həlledici rol oynadı. Şəhidlərimizin əziz xatirəsi heç vaxt unudulmayacaq, bu gün işğaldan azad olunmuş torpaqlarda aparılan quruculuq və abadlıq işləri onların müqəddəs amalına verilən ən yüksək qiymətdir.
Azərbaycan dünyaya göstərdi ki, o, qurucu və yaradıcı xalqdır, öz hüquqlarını qorumağa qadir xalqdır. Bu gün ölkəmizin irəli sürdüyü təkliflər Ermənistan tərəfindən qəbul edilməkdədir. Ermənistan Azərbaycanla normal qonşuluq münasibətləri qurmaq istiqamətində cəhdlər göstərir. Azərbaycan da buna hazırdır – yetər ki, Ermənistan beynəlxalq hüququ pozmasın, ölkəmizin ərazi bütövlüyünə iddia etməsin. Bu halda Cənubi Qafqazda davamlı sülhün və sabitliyin möhkəmlənməsi mümkündür".
Deputat həmçinin Azərbaycanın apardığı siyasətlə dünyaya kiçik bir xalqın böyük bir haqqının necə qoruduğunu göstərmiş olduğunu bildirib.
"Azərbaycan apardığı siyasətlə bölgədə sülhün əsasını qoydu və bütün dünyaya kiçik bir xalqın böyük haqqını necə qoruduğunu nümayiş etdirdi. 19–20 sentyabr 2023-cü il isə tariximizin şanlı səhifəsi kimi qalacaq" - deyə o əlavə edib.
Elmir Heydərli
13:01 20.09.2025
Oxunuş sayı: 1032
