Yüz illik yad miras milli dövlətimizin bədənindən əməliyyat yolu ilə çıxarıldı - Deputat
Azərbaycan xalqı üçün ən müqəddəs dəyərlərdən biri dövlət müstəqilliyi və suverenlikdir. Bu gün tariximizin şərəfli səhifələrindən olan Suverenlik Gününü qeyd edirik. Bu gün, Azərbaycan xalqının azadlıq iradəsini, milli birliyini və dövlətçiliyə sarsılmaz sədaqətini təcəssüm etdirir. Suverenlik, sadəcə siyasi müstəqillik deyil, həm də milli kimliyin, ərazi bütövlüyünün, xalqın öz taleyini sərbəst şəkildə müəyyən etmək haqqının rəmzidir.
Müstəqil Azərbaycanın qurulması və möhkəmləndirilməsi yolunda atılan addımlar tarixi məsuliyyətin, müdrik siyasətin və xalqın qətiyyətinin nəticəsidir. Bu gün biz qürurla söyləyə bilərik ki, suveren Azərbaycan beynəlxalq aləmdə öz layiqli yerini tutmuş, güclü dövlət, etibarlı tərəfdaş və regionun liderinə çevrilmişdir.
Əlamətdar gün ilə bağlı Crossmedia.az-a açıqlama verən Milli Məclisin deputatı Hikmət Babaoğlu suverenliyin hər bir millətin milli dövlət sərhədlərinin hər qarışında öz iradəsini həyata keçirməsi, hüquqi yurisdiksiyasını təmin etməsi demək olduğunu qeyd edib: “Suverenlik hər bir millətin milli dövlət sərhədlərinin hər qarışında öz iradəsini həyata keçirməsi, hüquqi yurisdiksiyasını təmin etməsi deməkdir. Təəssüf ki, biz bu haqqımızı bərpa etmək üçün uzun illər mübarizə aparmalı olduq. Torpaqlarımızın iyirmi faizi işğal altında qaldı. 44 günlük Vətən müharibəsindən sonra ərazi bütövlüyümüzü bərpa etdik. Lakin suverenliyin tam təmin olunması üçün təkcə otuz illik deyil, yüz illik problemin həllinə nail olmaq lazım idi.
Azərbaycan ərazisində süni şəkildə yaradılmış qondarma “muxtar vilayət” sovetlər dövründən bizə miras qalmışdı. Bu, müstəqillik dövründə başlanan müharibənin yox, sovet siyasətinin nəticəsi idi. Ona görə də illər keçdikcə bu məsələ bir çoxlarının gözündə artıq oturuşmuş, həll olunmaz bir problemə çevrilmişdi.
Lakin məhz Azərbaycan Prezidentinin – Müzəffər Ali Baş Komandanın siyasi iradəsi və qətiyyəti nəticəsində bu yüz illik yad miras milli dövlətimizin bədənindən sanki əməliyyat yolu ilə çıxarıldı. Azərbaycan dövləti bunu bacardı. 20 sentyabrda cəmi bir sutka davam edən lokal antiterror əməliyyatı ilə ölkəmizin suverenliyi tam bərpa edildi və Azərbaycan həqiqi mənada tam müstəqil dövlətə çevrildi".
"Əgər 44 günlük Vətən müharibəsi bizim tarixi Zəfərimiz idisə, bir sutkalıq antiterror əməliyyatı bu zəfərin tacı oldu. Bu tarixi hadisə xalqımıza əbədi qətiyyət, əbədi müstəqillik və əbədi azadlıq qazandırdı" - deyə o bildirib.
Elmir Heydərli
12:13 20.09.2025
Oxunuş sayı: 4521
