Azərbaycanın neft strategiyasının əsası məhz Ümummilli liderin rəhbərliyi ilə qoyuldu - Deputat
1994-cü il sentyabrın 20-də imzalanmış “Əsrin müqaviləsi” müstəqil Azərbaycanın yeni iqtisadi tarixinin başlanğıcı oldu. Ulu öndər Heydər Əliyevin siyasi iradəsi, qətiyyəti və uzaqgörənliyi nəticəsində reallaşan bu müqavilə Azərbaycanı dünya enerji xəritəsinə çıxardı, ölkəmizin beynəlxalq nüfuzunu möhkəmləndirdi və milli iqtisadi inkişafın möhkəm təməlini qoydu.
Dünyanın aparıcı enerji şirkətlərinin iştirakı ilə Xəzərin zəngin neft ehtiyatlarının işlənməsini nəzərdə tutan müqavilə Azərbaycanın strateji tərəfdaşlıqlarını genişləndirdi, enerji təhlükəsizliyi sahəsində mühüm layihələrin əsasını qoydu və ölkəmizi regional liderə çevirdi.
“Əsrin müqaviləsi” təkcə neft-qaz sənayesinin deyil, bütövlükdə milli iqtisadiyyatın dinamik inkişafına yol açdı, sosial rifahın yüksəldilməsinə, müasir infrastrukturun qurulmasına və Azərbaycanın dünya iqtisadi sisteminə inteqrasiyasına şərait yaratdı.
Bu gün müqavilənin ildönümünü qeyd edərkən biz böyük dövlət xadimi Heydər Əliyevin uzaqgörən siyasətini minnətdarlıqla xatırlayır, Azərbaycanın enerji strategiyasını uğurla davam etdirən Prezident İlham Əliyevin rəhbərliyi ilə ölkəmizin qlobal enerji mərkəzlərindən birinə çevrilməsinin şahidi oluruq.
“Əsrin müqaviləsi” Azərbaycanın müasir tarixinə yazılmış parlaq bir səhifədir və onun nəticələri bu gün də xalqımızın firavanlığına xidmət etməkdədir.
Əlamətdar və tarixi gün ilə bağlı Crossmedia.az-a açıqlama verən Milli Məclisin deputatı Vüqar Bayramov "Əsrin müqaviləsi"nin yeni imkanlara yol açdığını qeyd edib: "Azərbaycanın neft strategiyasının əsası məhz ümummilli liderin rəhbərliyi ilə qoyuldu. Bu strategiya və 1994-cü ildə imzalanmış “Əsrin müqaviləsi” bir tərəfdən Azərbaycanın qlobal siyasi mövqeyinin möhkəmlənməsinə, digər tərəfdən isə ölkəmizin inkişafı üçün yeni imkanların açılmasına şərait yaratdı. Bu kontekstdə 1994-cü ildən formalaşan enerji strategiyasının həm Azərbaycanın beynəlxalq nüfuzunun artmasına, həm də iqtisadi qüdrətinin yüksəlməsinə mühüm təsirləri müşahidə edildi.
Bu təsirlər nəticəsində Azərbaycan artıq regionun 14 ölkəsinə təbii qaz ixrac edir. Eyni zamanda ölkəmiz strateji valyuta ehtiyatlarını əhəmiyyətli dərəcədə artırmışdır. Hazırda Azərbaycanın strateji valyuta ehtiyatları 78 milyard ABŞ dollarına çatmışdır ki, bu da xarici borcumuzu 16 dəfədən çox üstələyir. Azərbaycan dünyada azsaylı ölkələrdəndir ki, strateji ehtiyatları ümumi daxili məhsuldan daha yüksəkdir. Bütün bunlar isə məhz həyata keçirilən enerji siyasətinin uğurlarının nəticəsidir.
Təbii ki, iqtisadiyyatın diversifikasiyası və neft gəlirlərindən asılılığın azaldılması əsas prioritet olaraq qalır. Son illərdə bu istiqamətdə ciddi nailiyyətlər əldə olunub. Əgər 2015-ci ildə dövlət büdcəsi gəlirlərinin təxminən 70 faizi neft sektorunun payına düşürdüsə, hazırda bu göstərici əhəmiyyətli dərəcədə azalıb və büdcə gəlirlərimizin yarıdan çoxunu qeyri-neft sektoru formalaşdırır. ÜDM-də qeyri-neft sektorunun payı isə 68 faizə yüksəlib".
Deputat həmçinin hazırda iqtisadiyyatın şaxələndirilməsi və qeyri-neft sektorunun inkişafı istiqamətində mühüm proqramların həyata keçirildiyini qeyd edib.
"İqtisadiyyatın şaxələndirilməsi və qeyri-neft sektorunun inkişafı istiqamətində mühüm proqramlar həyata keçirilir. Beləliklə, neft strategiyası ölkəmizin dövlət gəlirlərini artırmaqla yanaşı, iqtisadiyyatın davamlı inkişafına, yeni islahatların dərinləşməsinə və milli maraqların təmin olunmasına möhkəm zəmin yaratmışdır" - deyə o əlavə edib
Elmir Heydərli
11:37 20.09.2025
Oxunuş sayı: 6086
